Ofîsê Cinîyan ê Neteweyanê Yewbîyayeyan (UN Women) eşkera kerd ke vera rojnamegeranê cinîyan şîdetê sîberî di qat zêde bîyo. Sewbîna hişyarî daye ke zîrekîya viraşte (AI) bîya sebebê zêdebîyayîşê tehdîtanê vera rojnamegeranê cinîyan.
Ofîsê Cinîyan ê Neteweyanê Yewbîyayeyan (UN Women), derheqê şîdetê sîberî û tesîranê ci yê psîkolojîk ê rojnamegeranê cinîyan ser o raporêk pare kerd.
Raporî dîyar kerd ke nîsbetanê gerrekerdişê rojnamegeranê cinîyan ê vera polîsan, goreyê serranê 2020î di qat zêde bîyo û resayo se ra 22yî. Ame dîyarkerdene ke her çar cinîyan ra yew bi nê sebebî kewta depresyon û endîşe; na rewşe bîya sebeb ke se ra 45ê rojnamegeranê cinîyan torranê medya dîjîtal de fealîyetanê xo sînordar bikerê.
Cehdê bêvengkerdişê cinîyan ê dinya raya pêroyî de
UN Womenî da zanayene ke se ra 12yê rojnamegeranê cinîyan û pawitoxê heqanê merdiman, bi vilakerdişê fotografanê taybet ê bêîcazetî reyde rî bi rî mendê. Her wina se ra 6ê înan zî bîyê mexdûrê viraştişê foto û venganê sexteyan ke bi rayîrî zîrekîya viraşte virazîyenê. Ame dîyarkerdene ke na rewşe, sey cehdê bêvengkerdişê cinîyan ê heyatê pêroyî de û reşkerdişê nameyê înan ê meslekî û kesane yena vînayene. UN Womenî eşkera kerd ke eynî wextî de, nêzdîyê se ra 22yê rojnamegeranê cinîyan karê xo yê meslekî de muracatê bêvengîye kenê xo hêrişanê rêxistinkerdeyan ê dîjîtalî ra biseveknê.
‘Qanûnê huşkî lazim ê’
UN Women veng da hukmatan ke seba vernêgirewtişê tacîzê sîberî qanûnê huşkî bêrê vetene. Çunke dinya de se ra 40ê welatan de qanûnê seveknayîşî est ê; ganî platformê dîjîtalî vera nê krîzî bi hesasîyet vinderê.
‘Milyarêk û 800 mîlyonî cinî binê tehdîtê sîberî de yê’
Ney ra ver zî rêxistinanê heqanê merdiman û UNESCO’yî hişyarî dabi ke seba çinbîyayîşê seveknayîşê qanûnî, dinya de nêzdîyê mîlyarêk û 800 mîlyon cinî bi tehdîtanê sîberî reyde rî bi rî manenê û bêseveknayîş ê.
