Rojnamegerê ke roniştişê înan o verên ame dîyene Semra Turan, Tolga Guney û Melîke Aydin dîyar kerd ke xebatê rojnamegerîye nêeşkenê bibê sûc û înan kesî ra talîmat nêgirewto.
Muxabirê Ajansa Mezopotamya (MA) Semra Turan û Tolga Guney û muxabira JINNEWS’î Melîke Aydin seba xebatanê xo yê rojnamegerîye bi îdîaya “endamtîya rêxistine” yenê muhakemekerdiş. Mehkemaya 13. a Cezaya Girane ya Îzmîrî de roniştişê verên ê dewaya înan ame dîyene. Rojnameger û parêzerî roniştişî de amade bîyî. Hemserekê Komela Rojnamegeran a Dîcle-Firatî (DFG) Selman Çîçek, Temsîlkarê Komîteya Pawitişê Rojnamegeran (CPJ) Ozgur Ogret û endamê Komela Cinîyanê Rojnamegeran a Mezopotamyayî zî roniştişî teqîb kerd.
‘Xebatê meslegî nêeşkenê bibê sûc’
Badê tespîtkerdişê nasnameyî mudafaya muxabira JINNEWS’î Melîke Aydin ame girewtene. Melîke Aydinî va ke xebatê aye yê meslegî sey suc yenê vînayene. Melîke Aydin wina dewam kerd: “Qiseykerdişê ke mi kerdê sey sûc yenê vînayene. Mi çimeyê xeberan reyde tena derheqê xeberan de qisey kerdo. Algîyo ke mi çimeyê xeberan ‘sevk kerdê’ raşt nîyo. Kesê ke îddîaname nuşta derheqê rojnamegerîye de zanayîş û fikrê înan çin o. Seba ke reya diyine bi no hewa yena muhakemerdiş ez zaf qehiriyena. Tim eynî sûcî yenê vatene. Arşîvê mi yê xeberan reyna bîyê sûc. Tayê xeberê mi bi taybetî ameyê weçînayene û bîyê sûc.”
Avûkata Melîke Aydin Şukran Ozturk dîyar kerd ke muvekîla aye bi eyn sûcan yena muhakemekerdene û va: “Rojnamegerî, zaf kesan reyde têkilî ronanê. Çunke rojnameger rayîrê şarî akeno. Xeberê ke muvekîla mi kerdê bîyê babetê sûcî, no bi hawayêko qestî ameyo kerdene. Bi amancê vernîgirewtişê xebata rojnamegerîye yê Melîke yo. Rojnamegerî şênê her meseleyî ser o bixebitîyê. Dosya de qet xeberêka ke propaganda bikera çin a. Ma bi no fehm sûcê ke erzîyayê muvekîla ma qebul nêkenê.”
Dozger waşt ke seba ke şahidê ke nêameye eşnawitene bêrê eşnawitene prosedurê lazimî bêrê kerdene. Reyna waşt ke şertê kontrolê edlî dewam bikero. Avûkat Şukran Ozturk verba waştişê dozger vejîya û waşt ke şertê kontrolê edlî bêro wedarnayene û qerarê beraetî bêro dayene.
‘Ma talîmat nêgênê’
Rojnameger Semra Turan va ke a sûcê “endamtîya rêxistine” qebul nêkena. Semra Turan îşaret kerd ke a Ajansa Mezopotamya (MA) de xebitîyena û heme sûcê ke sey delîl ameyê pêşkêşkerdene xebatê meslegî yê. Semra Turan wina va: “Ma rojnameger ê. Ma kesî ra talîmat nêgênê. Eke çîyêk sey talîmatî bêro dîyene, her problemê ke şar ciwîyeno û her hedîseyo ke ganî rayê şarî ra bêro eşnawitene seba rojnamegeranê ke nê welatî de ciwîyenê beno talîmat.”
Semra Turan dîyar kerd ke “Kurdîstan” û “tecrîdo” ke Abdullah Ocalanî ser o yo, bîyo babetê sûcî û reyna xeberê ke aye derheqê çareserîya meseleyê kurdî de kerdê bîyê babetê sûcî. Semra Turan wina dewam kerd: “Serekkomar Erdogan bi xo zî îbareya Kurdîstanî şuxulnaya û ma zanê ke ey rexneyanê ke ey rê ameyê vera va ‘Eke qaydanê kehenan ra biewnîyê, do Kurdistan zabitan de bivînê.’ Wextêko nêzdî de Serekê MHP’yî Dewlet Bahçelî binê sîya meclîsî de waşt ke tecrîdê ke Abdullah Ocalanî ser o yo bêro wedarnayene û keyeyê ey reyde pêvînayîş bibê. Dima reyna Bahçelî derheqê Ocalanî de qala ‘Heqê Hêvîyî’ kerd, bi hewayêk azadîya ey waşt. Wexto ke vatişê nê kesanê ke welatî îdare kenê nêbenê sûc, rojnamegerê ke waştiş û ewnîyayîşanê şarî kenê xeber sey sucdar yenê vînayene. Eke tîya ra sûcêk vejîyo, o wext ganî Serekkomar û Dewlet Bahçelî zî bêrê muhakemekerdiş. Çunke vatişê Bahçelî bi xo îtîrafê tecrîdê ke huqûqê mîyanneteweyî ra ziddî yo û Abdullah Ocalanî ser o yeno tetbîqkerdene yo. No delîlê ê çîyo ke waştişê azadîya Ocalanî sûc nîyo.”
‘Şexsê rojnamegeran de şar yeno muhakemekerdiş’
Semra Turan wina dîyar kerd: “Ma bi zorî kesî ra roportaj nêgênê û bi zorî rayê şarî nêvirazenê. Ma çîyê ke nê welatî de qewimîyenê nusenê.” Semra Turan wina dewam kerd: “Parekerdişê ke mi hesabanê medya sosyalî de kerdê pêro derheqê xeberan de yê û çarçewaya azadîya fikrî de yê. Qet amancêk tede çin o. Ez di rojê hefteyî de saetanê dîyarkerdeyî de îmze erzena. No hem seba şîyayîşê teberê bajarî hem zî seba ke ez meslegê xo rehet bika problem virazeno, ez beraetê xo wazena.”
Dozgerî seba Semra Turan derheqê “endamtîya rêxistine” de ceza waşt. Avûkatan wext waşt.
