Leyla Qasima ke bi xoverdayîşê xo her çar hetanê Kurdîstan de seba têgêrayîşê cinîyan bîye çimeyê îlhamî û bi toximanê xoverdayîşî nameyê xo dabi bi seyan Leylayan; ewro serrgêra qetilkerdişê xo ya 52. de yena yadkerdene. Hemsereka Pêroyî ya DBP’yî Çîgdem Kiliçgun Uçar hesabê xo yê X’î ser o seba yadkerdişê aye mesajêk pare kerd û wina vat: “Ewro xoverdayîşê aye têkoşînê azadî yê cinîya kurde rê hêz dano.”
Leyla Qasim û 4 embazê aye 52 serrî ra ver ewro ameyî dardekerdene. Seba ke bala merdiman biancê îşxal û zilmo giran ê Kurdîstanî ser o, Leyla Qasim û 4 embazê aye serra 1974î de waşt ke teyareyêk biremnê. 48 serrî ra ver ewro, bi destê rejîmê Baasî yê Îraqî ameyî dardekerdene.
Leyla Qasim, mîyanê têkoşînê azadîya kurdan de bîye cinîya şorişgir a yewin ke ameya dardekerdene. Aye û embazê xo vera zulmî serê xo çewt nêkerd û bi nê qeydeyî kewtî tarîxê Kurdîstanî. Leyla Qasima ke têgêrayîşê cinîyanê kurdî rê bîya çimeyê îlhamî ewro hetê xeylê kes û sazgehan ra yena yadkerdene. Hemsereka Pêroyî ya Partîya Herêman a Demokratîke (DBP) Çîgdem Kiliçgun Uçar hesabê xo yê X’î ser o Leyla Qasim bi nê vatişan yad kerd:
“Cinîya şorişgere, sembola cuya rûmetdare û azadîye Leyla Qasime 12yê gulana 1974î de bi destê rejîmê Baasî yê tedakerî ameye dardekerdene.
Leyla Qasima ke vera polîtîkaya teda û asîmîlasyonî bîye nîşanê xoverdayîsî, qe nêterse û waxtê dardekerdisî de bi vateyê xo “Dardekerdisê mi yo rawuştisê sarê mi bibo” ma rê mêrasêkê têkoşînî verada.
Ewro xoverdayîsê aye bi felsefeya Cinîye, Cuye, Azadî pîlêr beno û têkoşînê azadî yê cinîya kurde rê hêz dano. Bi nê hîsan ez verê vîrameyîsê Leyla Qasime de ebe hezkerdis û hesrete vileyê xo çewt kon.”
