Şaredarîya Amedî ya Şaristanê Girdî, seba nêweşanê kansêrî prosesê tedawî de seba ke mîyanê keye û nêweşxane de xizmet bido Projeya Taksîya Sosyale afirnaye.
Serekîya Daîreya Xizmetê Astengdar û Kalan, bi dirişmeya “Ciwîyayîşê Pîyayî yo Resnayox” na proje viraşte. Xizmetê Taksîya Sosyale ke binê Mudirîya Şûbeyê Nêweşîyanê Nadîr û Kronîkan de xebatanê xo ramneno, do nêweşê kansêrî ke zehmetîya resî ancenê, keye ra bigîro û nêweşxaneyanê ke tedawî vînenê, uca de verdo. Nêweşê ke tedawîya xo qedênê do Taksîya Sosyale reyde şêrê keye. Taksîya Sosyale ke seba ke prosesê tedawî de rîskê enfeksîyonî kêmî bikero û rehetêr biresê nêweşxaneyan ameya viraştene, do şarî rê xizmetê resî yê bêpere bido.
Vengdayîşî ALO 153 ser ra
Nêweş û merdimê nêweşan ke ALO 153 ser ra veng danê do yew roj ra ver randevu bigîrê û Xizmetê Taksîya Sosyale ra îstîfade bikerê.
Serekê Daîreya Xizmetê Astengdar û Kalan Îsmaîl Degîrmencî derheqê proje de agahî da û va ke hîna zêde nêweşê ke ameyeyê înan kêmî yo, wazenê ke nê xizmetî ra îstîfade bikerê.
Serekê Komela Têkoşînê Vera Kansêrî ya Cuya Newîye ya Amedî Şukru Abayî va ke Amed û dewan de 20 hezarî ra vêşêr nêweşê kansêrî est ê. Abayî qeyd kerd ke 10 serranê peyênan de 324 nêweşê kansêrî wesayîtanê resê pêroyî de seba ke enfeksîyon girewt, merdê û va ke no xizmet seba înan rojêka tarîxî ya.
Zelîha Ozdag Gozen ke nêweşa kansêrî ya û bi Taksîya Sosyale keye ra ameya girewtene û Nêweşxaneyê Onkolojî de ameya verdayene, va “Ez Surê Amedî de ronişena. 7 serrî yo ke ez nêweşa kansêrî ya. Seba ney ez her roj tedawî vînena. Seba ke ez tedawî vînena wexto ke ez otobuse reyde şina zehmet beno. Înşalah nika ra dima ma do hîna rehet bêrê û tedawîya xo bivînê. Ez wazena ke no îmkan dewam bikero. Ez Şaredarîya Şaristanê Girdî, Serra û Dogan Hemşaredaran û hemê xebatkaran rê sipas kena.”
