Rotoxê awa sûsê Mehmet Emîr ke 41 serrî yo nê karî keno, bal ant zehmetîyanê meslekê xo û tesîrê krîzê ekonomî yê rotişî ser o. Mehmet Emîrî dîyar kerd ke o 1985î ra nat nê karî keno û behsê qonaxanê viraştişê awa sûsê kerd.
Dara sûsê cayanê awîyan de bena û kokê ci ra zî awe sûsê amade bena. Aşmanê german de Amed de welatî seba honikbîyayîşî awe sûsê şimenê. Na awe, eynî wextî de seba weşîya merdiman zî sey dermanî ya. Awe sûsê ke bi zor û zehmetîyan herêmanê koyan ra ameyêne arêdayene û dima ra ameyêne viraştene, nika kuçeyanê qezaya Sûrî de û zaf cayanê Amedî de yena rotiş.
Labelê krîzê ekonomî yo ke her roje hîna zêde beno, tesîrê rotişê awa sûsê zî kerd. Rîyê krîzê ekonomî ra eleqeyê welatîyan ê seba awa sûsê zî kemî bîyo. Mehmet Emîro ke 41 serrî yo awa sûsê roşeno, ajansê ma rê qisey kerd û bal ant krîz û zehmetîyan ser o.
Mehmet Emîrî da zanayene ke seba viraştişê awe sûsê kedêka zaf pîle yena dayene û wina behsê detayanê viraştişî kerd: “Ez 41 serrî yo nê karî kena. Ma şonî kokê dara sûsê anê, şuwenê û dima ra bi çakûçan kuwenê. Wexto ke ma kut, ma reyna şuwenê. Dima ma kenê mîyanê teştî û awe verdanê ser. Gama ke sey çayî dem girewt, peynî de ma awe kenî ser, parzûn kenî û anê sûke de roşenî.”
‘Nika ma nêeşkenî se qedehan zî biroşî’
Mehmet Emîrî îfade kerd ke goreyê serranê verênan rotişê awa sûsê zaf kêmî bîyo û krîzê ekonomî hêzê herînayîşî yê şarî kêm kerdo.
Mehmet Emîrî behsê wextê verênî zî wina kerd: “Verê ma roje de 600-700 qedehî rotêne labelê çi heyf ke nika rotiş zaf kemî bîyo. Nika ma xo bikîşî zî heta şand yan 100 qedeh yan zî 150 qedehan roşenî. Sebebê nê çî zî no yo ke, şarî de pere çin ê.”
Seba zaf nêweşîyan derman o
Peynîya qiseykerdişê xo de Mehmet Emîrî bal ant serê feydanê awa sûsê yê seba weşîya merdiman û wina vat: “Şimitişê naye seba mîde, gurçîk û dejê sereyî sey dermanî yo. Eke merdim şodir de pîze vêşan bişimo, seba weşîya ey zaf rind o.”
