Hemserekê DEM Partî yê Pêroyî Tuncer Bakirhanî ard ziwan ke verba ferasetê qeyûmî ê do hertim û her ca de aştî û muzakereyan bipawê û piştî bidê Rayberê PKK’yî Abdullah Ocalanî.
Hemsereka DEM Partî ya Pêroyî Tulay Hatîmogullarî û Tuncer Bakirhan û hemşaredaran, Enqera de verba tayînkerdişê qeyûman çalakî kerd. Tuncer Bakirhanî va: “ma ewro verba neheqîya ke weçînayîş û weçînayoxan ser o bena bîyarê ziwan ma Anqara de ameyê têhet. Ma seba derbeyêka ke ameya meydan bîyarê ziwan ameyê tîya. Ma Esenyurt de, Wanî de û heme şaristanan de ke qeyûm tayîn bîyo zî vengê xo vejenê. La çi heyf ke Anqara vengê şarî û vengê ma nêeşnawena.” Bakirhanî îfade kerd ke ê wazenê şar xo bi xo xo îdare biko û va: “Masaya îqtîdarî de înkarê kurdan est o. Asîmîlasyonê kurdan est o. Tayînkerdişê qeyûmî est o. Masaya ma de çareserî û aştî est a. Ma cehd kenê ke senî aştî, asayîş û demokrasî bîyarê. La masaya Anqara de qeyûm, zordarî, tepiştiş û destbendkerdiş est o. Ma nê kerdişan qebul nêkenê.”
