Hemşaredara Şaredarîya Amedî ya Şaristanê Girdî Serra Bucak, bi munasebetê 21ê sibate Roja Ziwanê Dayîke Bazarê Semtî yê Qezaya Yenîşehîrî de etîketê vayîye yê bi kurdkî vila kerdî û bale ant muhîmîya ziwanê dayîke ser.
Serekîya Daîreya Karê Kulturî û Sosyalî ya Şaredarîya Şaristanê Girdî, Mudirîya Kulturî ya Şaredarîya Yenîşehîrî reyde bi munasebetê 21ê sibate Roja Ziwanê Dayîke Bazarê Semtî ke Taxa Kooperatîfan a Qezaya Yenîşehîrî de ronîyaya, tede aktîvîte organîze kerd.
Aktîvîte de, Hemşaredara Şaredarîya Amedî ya Şaristanê Girdî Serra Bucak reyde Hemşaredarê Şaredarîya Yenîşehîrî Mehmet Ergun, serekê daîreyan û endamê meclîsî beşdar bîyî.
Hemşaredare Bucak û kesê ke tewrê aye bîyî, esnaf û şarî rê etîketê vayîye yê bi kurmanckî û kirmanckî nuşteyî, tabelayê beran ke ser o “akerde-girewte” nuşte yo, kokartê yaxeyî û stîckerî ke hişmendîya ziwanî anê ziwan, vila kerdî.
Hemşaredare Bucak esnafan reyde sohbet kerd û derheqê rewşa bazarî de esnafan ra malumat girewt. Bucak ke hetê esnaf û şarî ra eleqayêko pîl dî, bale ant muhîmîya ziwanê dayîke ser.
Hemşaredare Bucak, Bazarê Semtî ra dima esnafê ke Kuçeyê Qişla 1î de yê, înan rê zî tabelayê beran ê bi kurmanckî û kirmanckî ke ser o “akerde-girewte” û “Şima Bixeyr ameyî” nuşte yo vila kerdî.
