Keyeyê şehîdan ke nobeta pawitişê Awbendê Tişrînî de ca gênê dîyar kerd ke verba plananê îşxalî yê dewleta tirke xoverdayîşê înan dewam keno û vat “Gedeyê ma do bi xoverdayîş û keda ma sereberz bibê.”
Şarê Vakur û Rojhelatê Sûrîye verba hêrişanê dewleta tirk û grûbanê paramîlîteran yê hemverê Awbenê Tişrînî çalakîya nobete kenê. Keyeyê şehîdan ê kantonê Tebqayî ke nobete de cayê xo girewt dîyar kerd ke do xoverdayîşê xo bidomnê, deskewteyan û welatê xo bipawê.
Hemserekê Meclîsa Keyeyê Şehîdan ê Kantona Tebqayî Mehmûd El Sayîl ard ziwan ke keyeyê şehîdan cigera xo daya û bi saya fedakarîyanê şehîdan şar azade ciwîyeno.
Mehmûd El Sayîl wina dewam kerd: “Keyeyê şehîdan ê kêsî pêşeng bîyê ke hemverê plan û hêrişanê ke herêma ma de benê, vindertê. Kesê pêşeng bîyê ke Awbendê Tişrînî de ca girewt. Birîndar zî bîyê la reyna agêrayê awbendî û ey pawit. No zî ma rê vindertişê înan yê verba ê kesan mojneno ke hewl danê erdê ma yo erjaye lêmin bikê.”
Hemjîna şehîd Mihemed El Mûsa Meryem El Şerîd dîyar kerd ke ê mîrasê gedeyanê xo yê şehîdan ra fek veranêdanê.
Hemjîna şehîd Nadîr El Selama û waya di şehîdan Delal Selama vat ê bi şehîdanê xo sereberz ê û ard ziwan ke şehîdan seba erdê şarê xo bipawê gonîya xo rijnaye.
Hemjîna şehîd Ebdullah El Îsa Fatin Şêx Nasir zî cayê xo çalakîya nobete ya Awbendê Tişrînî de girewt û dîyr kerd ke tewrbîyayîşê aye yê çalakîya nobete dewamê xeta şehîdan o û wina dewam kerd: “Ma do rayîrê şehîdanê xo bidomnê. Ma welatê xo îşxalkeran rê nêverdanê. Ma do erdê xo ser o bimanê, bi keda şehîdanê ma do gedeyî welatêko azade de biciwîyê û bi xoverdayîş û fedakarîyanê ma sereberz bibê.
