Merkezê Pêroyî yê DAD’î 21ê Sibate Roja Ziwanê Dayîke ya Dinya pîroz kerd û aşkera kerd ke ganî verba polîtîyê zilmî de bi ziwanê dayîke bêro qisekerdene, nuştene û cem bêro kerdene û no ser zî bi ziwanê dayîkê têkoşîndayîş avzel o.
Merkezê Pêroyî yê DAD’î 21ê Sibate Roja Ziwanê Dayîke ya Dinya pîroz kerd û aşkeraya xo zî bi kirmanckî da.
Aşkeraya DAD’î wina yo: “Nizam u îzane dewletpereştenî, bandira xo ebe politiqa azvurnayîs u azbirnayîsî ra ramito, ver gureto, naye ra kî xeyle zonî ya bîyê vîndi, ya ki na rîwal ra averî nê şîyê. Na rastîye bandira u demê İttîhat u Terakkî ra nato ke biya tenga de girane, weşîya qomunê ma de kî cayê xo gureto.
Zon u zarawayê ke Tirkîya de qeseyî benê, des u heştê xo endi Atlasê Zonê Cîhanî yê ke Şîndorê Vindbîyayîsî de re, o Atlasî de cayê xo gureto. Gore na Atlasî; Hertevînkî, Gagavuzki, Ladinoki, Suryanki, Abazakî, Hemşînkî, Lazkî, Yunankîyê Pontusî, Romankî, Adigeki, Zonê Kabar u Çerkesu, Zarawayê Kurdkî ra Kirmanckî endî şîndorê vîndbîyayîsî de rê.
Îzan û nîzame juperest u neheq, Cîhanî kerdo mezelxaneyê zonu, na kerdenu qewul nê kenîme. Felsefeyê Raa/Reya Heqî de vanime ke “hotaw u di zonî ki yê ma yê”. Her milet gereke ebe zon u rastîya xo weşîya xo biramo.
Qomê ma zonê xo re vato zonê Xiziriyo, Rawa xo ebe zonê ramito, zonê xo de veng do Haqî. Dewrê cumuratî ra nato ke, ebe bandira u azvurnayîsî ra kerdo ke zonê xo, xo vīra kerîme. Ma zonenîme ke, zonë xo ke kerd xo vira, raştîye de zonê ma be Raa ma ra pîya benê vîndî sonê. Wayîr vejîyayena zonî de, qeret u emegê roştberu be qomê ma ra kem maneno. Weşîye ramitene de, cem u cemaatî de, veng dayîsê Haqî de Kirmanckî dariyo we, giranîye ra Tirkî ca biyo.
Naye rîwal ra gereke azvurnayîsî qewul mekerîme, zonë xo qeseyî kerîme, biwanime-binuşnime, Raa xo zonê xo de biramîme, cemunê xo zonê xo de giredîme. Nizam u îzane înkar u azvurnayîsî qewul mekerime, ser ba “zoné dayîke de wendene kî” xoverestîşê xo berz kerîme.
21’yê Gucige, Roza Zonê Dayîku Yê Cîhanîya. Na rîwal ra, Bonê Komela Demokratik Yê Raa Haqî Yê Dersîm’î de, Kirmanckî be Kurmancî de atolyeya zonî dest ci kenime. Hete ra kî, ser ba zonê dayike de wendene xoverestişê xo kenîme berz.
21’yê Gucige, Roza Zonê Dayîku Yê Cîhanî, hem qomê ma re, hem kî qomunê Cîhanî re bimbarek bo!
Roza Zonê Dayîka Bimbarek Bo!
Roja Zimanê Dayikê Pîroz Be!
Zimanê me Îtîqatê me ye!
Zonê ma Îtîqadê ma yo!”
