Cinîyê ke Stenbol de tewrê çalakîya 8ê Adare bîyê dîyar kerd ke 8ê Adare roja cinîyan a û ganî heme cinî 8ê Adare de waran ra wayîrê yewbînan vejîyê û vat: “Cinî wazenê polîtîkaya pederşahî bêra wedaritene. Ma do 8ê Adare de waran ra vengdayîşê azadîya cinîyan bikerê”
Têgêrayîşê Cinîyan ê Azad (TJA) ver bi 8ê Adare Roja Cinîyan a Dinya de qezaya Kartal a Stenbol de çalakî viraşte. Cinîyê ke tewrê çalakî bîyê ewnîyayîşê xo ajansê ma rê îfade kerd.
‘Ma do her wext xover bidê’
Hemsereka Komeleya Elewîyan a Demokratîke (DAD) Mercan Gul dîyar kerd ke cinî waranê 8ê Adare de waştena xo berz kenê û vat: “Ma zî wazenê sey her kesî azad biciwî. Heqê ma zî sey her kesî bibo. Cinî bi se serran o xover danê. Cinî wazenê polîtîkaya pederşahî orte ra bêra wedaritene. Ma wazenê kuçeyan de azad bigêrê.”
‘Ma heqanê xo wazenê’
Zelîha Gunay dîyar kerd ke ê wazenê cinî serkewê û wina wat: “Ma wazenê Rojava de, Rojhelat û Şengal de serkewê. Ma heqanê xo wazenê. Serekê ma wa mabênê ma de bo. Serek azad nêbo ma zî azad nêbenê. Ma do serkewê. Ez veng dana heme cinîyanê dinya û vana wirzê.”
‘Ganî cinî 8ê Adare waran de wayîrê yewbînan vejîyê’
Makbule Yilmaz zî îfade kerd ke a veng dana cinîyan ke 8ê Adare waran de bê û wina vat: “Ma seba wayîrvejîyayîşê Rojava ganî waran ra bê. Ganî heme cinî 8ê Adare de waran ra wayîrê yewbînan vejîyê. 8ê Adare roja heme cinîyan a, ganî her kes waran ra bo. Cinî cuye azadî.”
‘Ma wazenê azad biciwîyê’
Husna Yildiz zî îfade kerd ke 8ê Adare roja cinîyan a û wina qisey kerd: “8ê Adare New York de vejîya ma zî ewro seba 8ê Adare waran ra yê û xover danê. Azadîya cinîyan çin bî. Têgêrayîşê kurdî seba azadîya cinîyan têkoşîn da. Ma do 8ê Adare waran ra vengdayîşê azadîye yê cinîyan bikerê. Ma wazenê azad biciwîyê.”
‘Ma do serkewê’
Emîne Seçen zî vat: “Cinî cuye azadî. Ma aştî wazenê. Seba şarê kurdî serkewtene wazenê û ma do serkewê.”
