Heqê têkilîya telefonî yê tepişteya kurde Sakîne Pervane ke Hepisxaneyê Evîn de ya, nêzdîyê 7 aşmî yo keyeyê aye reyde yeno astengkerdiş.
Tepişteya kurde Sakîne Pervane ke Hepisxaneyê Evîn yê Tehranî de ya, tebaxa 2024î ra nat heqê têkilîya telefonî keyeyê aye reyde nêyeno dayene. Hewldayîşê ke Sakîne Pervane seba ke heqê têkilîya telefonî bişuxulna, kerdê encam nêdayo.
Seba ke keyeyê Sakîne Pervane ke şaristanê Goçanî de ciwîyenê bi emrê xo kalî yê û nêşenê rayîranê dergan ra şêrê, a bi aşman o keyeyê xo nêvînena.
Sakîne Pervane kam a?
Sakîne Pervane, nîsane 2023î de seba ke şîya serdayîşê mezelê Alî Muzafferî ke serhildanê “Jin, jîyan, azadî” de bajarê Goçanî de cuya xo vîndî kerda, ameya tepiştiş. A berde merkezê destbendkerdişê Cayê Îstîxbaratê Muhafizanê Dewrimî yê Îslamî. A 12 rojî uca tepişîyaye û dima sewqê Hepisxaneyê Vekîlabadî ya Meşhedî bîye.
Teşrîna Verêne 2023î de Şûbeya 1. ya Mehkemeya Dewrimê ya Meşhedî seba “Vera ewleyîya welatî kombîyayîş û hemkarîye” 6 serrî ceza daye ci, seba “Vera Komara Îslamî ya Îranî kerdişê propaganda” 1 serr û 6 aşmî zî ceza daye ci. Dosyaya aye hetê Şûbeya 35. ya Mehkemeya Temyîzî ra ameye qebulkerdiş. Goreyê Maddeyê 134. yê Qanûnê Cezayê Îslamî, cezaya tewr girane 6 serrî ameye caardiş.
Sakîne Pervane, 3ê nîsane 2024î de Hepisxaneyê Vekîlabadî ya Meşhedî ra neqilê Hepisxaneyê Evîn bîye.
