Şaredarîya Amedî ya Şaristanê Girdî, seba ke ewleyîya cinîyan bipawo û hewcedarîyanê înan bîyaro ca, aplîkasyonê JIN MAP’î da şinasnayene. Lansmanê nê aplîkasyonî bi perspektîfê “Şaristanê Cinîyan”, bi amadekarîya Serekîya Daîreyê Polîtîkayanê Cinîyan û Serekîya Daîreyê Zanakirarî otelêkê şaristanî de virazîya.
Vera netêduştîye çareserîya dîjîtale
Şaredarîya Amedî vera bêewlehî û netêduştîya ke cinîyî qadan de rî bi rî manenê, na gama dîjîtale eşt. Lansman de ame mojnayene ke ganî polîtîkayê azadîwazîya cinîyan rayberîyanê herêmîyan de hîna zaf bêrê kerdene.
Cinîyî do şerîkê şaristanî bibê
Sereka Daîreyê Polîtîkayanê Cinîyan Ozden Gurbuz Sumer qiseykerdişê xo de wina vat: “Amancê ma no yo ke cinîyî her qada cuye de bîbê kirdeyê aktîfî. Bi JIN MAP’î, ma parke, ding û rayanê şewe goreyê tecrubeyanê cinîyan newera virazenê. Ma xerîteya herêmanê bitehlukeyan vejenê û seba qadanê bêewlehîyan platformêko dîjîtal awan kenê.”
Seba şaredarîyanê bînan bîye model
No aplîkasyono ke bi şirîktîya Serekîya Daîreyê Teknolojîyanê Zanakirarî amade bîya, qada mîyanneteweyî de zî eleqa dî. Sumer dîyar kerd ke na xebate “Programê Şaristananê Dostanê Cinan” de ca girewto û bi piştgirîya Yewîya Ewropa û UNFPA’yî, seba 24 şaredarîyanê bînan bîya nimûne.
