Şaredarîya Şaristanê Girdî ya Amedî, do 4 cayanê cîya-cîyayan ê bajarî de çadiranê ke ronena, tede Aşma Remezanî de rojane 6 hezar û 500 kesan rê îftar bido.
Serekîya Daîreya Xizmetê Sosyalan, Aşma Remezanî de ke hetkarîya û piştîdayîş zêde beno, 4 merkezanê cîya-cîyayan de seba çadiranê îftarî dest bi amadekarîyan kerdo. Çarçewaya amadekarîyan de, Meydanê Berê Koyî, Nêweşxaneyê Perwerde û Cigêrayîşî yê Gazî Yaşargil, Parka Ben û Senî ya qezaya Yenîşehîrî û Parka Keyeyê Tenûre ke kişta Çarşîya Penîrcîyan a Baglarî de ya tede çadirê îftarî do bêrê ronayene. Çadiran de ke hem do hewcedarîya şarî ke nêşeno îftar bikero û hem zî şarê ke wextê îftarî rayîr ra maneno temîn bibo, rojane 6 hezar û 500 kesan rê îftar do bêro dayene.
‘Ma çadiran cayanê qelebalixan de ronenê’
Sereka Daîreya Xizmetê Sosyalan Serap Yildirim ke derheqê çadiranê îftarî melumatî dayî, dîyar kerd ke înan bi wesîleya Aşma Remezanî dest bi amadekarîyan kerdo û va: “Aşma Remezanî de ma hedef kenê ke çar cayanê cîya-cîyayan de, herêmanê qelebalixan de şarê ma rê werdo germin bidê. Ma dest bi xebatanê xo kerd. Ma do Meydanê Berê Koyî, Nêweşxaneyê Perwerde û Cigêrayîşî, Parka Ben û Senî, Keyeyê Tenûre yê Baglarî de rojane 6 hezar û 500 kesan, 29 rojan de bi pêroyî 188 hezar û 500 kesan rê werdê îftarî pêşkêş bikê. Do menuyê ma de çar tewir werdî bibê.”
‘Şaredarîya Şaristanê Girdî heme tedbîrî girewtî’
Yildirim ke dîyar kerd ke werdê îftarî do paketbîyaye şertanê weşîye de servîs bibê, va ke seba de Aşma Remezanî bê problem vîyaro, înan sey Şaredarîya Şaristanê Girdî heme tedbîrî girewtê. Yildirim va: “Ma do werdê ke do hetê Serekîya Daîreya Karê Weşîye ya ma ra bêrê kontrolkerdiş, pak û bihîjyen biresnê şarî. Ma do Aşma Remezanî de xebatanê kontrolî zî bîyarê ca. Serekîya Daîreya Zabita do zî çadiran de tedbîranê emnîyetî bigîro.”
‘Ma do na aşme piştîdayîşî şarê xo reyde vîyarnê’
Yildirim bale ante ser ke seba ke butçeya şarî rê bibê sey ruhê Aşma Remezanî, xizmetê xo biresnê şarî û şaredarîya xo bikerê berê piştîdayîş û sifreyê piştîdayîşê şarî, heme merkezê şaredarîye û xizmetê aye do şarî rê akerde bê û wina va: “Ma sey yew hedefêk seba şertanê ekonomîyanê zehmetîyan de Aşma Remezanî de zî piştîdayîşê şarê xo kerdo karê xo yê yewin. Ma do xizmetanê şaredarîye de, Aşma Remezanî de sifreyê şaredarîye bi ruhê piştîdayîşî akerê; ma do werdêko germin biresnê şarê xo. Ma do na aşme bi piştîdayîşî şarê xo reyde vîyarnê.”
