Şaredarîya Farqînî seba cinîyan Merkezê Hemkarî û Ciwîyayîşê Cinîyan akerd û akerdişê merkezî de ame vatene ke do no merkez do bibo cayê girdkerdişê hemkarîya cinîyan.
Merkezê Hemkarî û Ciwîyayîşê Cinîyan ê Nudem ke hetê Şaredarîya Farqînî ra Taxa Selahatinî de ame viraştene, akerdişê ci ame kerdene. Akerdişî de Hemşaredara Şaristanê Girdî Serra Bucak reyde Parlamentera DEM Partî Adalet Kaya, Hemşaredara Şaredarîya Farqînî Sevim Biçici, Hemşaredarê şaredarîyanê qezayan, endamê meclîsî û temsîlkarê rêxistinanê cinîyan zî beşdarê akerdişî bîyî.
Hemşaredare Bucak: Do seba cinîyanê Farqînî bibo sitargehêk
Hemşaredare Bucak ke akerdişê Merkezê Hemkarîya Cinîyan de qisey kerd, va ke ê dewam kenê cayê cinîyan akenê. “Seke ma soz dabî, caya ke ma mendbî, ma uca ra dewam kenê. Merkezê Hemkarîya Cinîyan ê Nudem, do seba cinîyanê Farqînî û seba cinîyanê Amedî bibo sitargehêk, bibo ware. Do bibo cayêk ke tede hemkarîya cinîyan û rêxistinbîyayîşê cinîyan gird bibo.”
‘Ma hemkarîya cinîyan kenê gird’
Hemşaredare Bucak ke behs kerd ke derheqê çareserîya meseleyê kurdan de munaqeşayî dewam kenê û va: “Ez bawer kena ke cinî do seba vengdayîşê aştî û şarê demokratîkî hîna bi hêz û rêxistinbîye cewab bidê.”
Hemşaredare Bucak bale ant ser ke gama ke ê ver bi 8ê Adare şinê, têkoşînê cinîyan ê rêxistinbîyayîşî kenê gird û wina dewam kerd: “Ma bi hemkarîya cinîyan û hêzê cinîyan reyde, dayîkanê xo reyde, cinîyan reyde, cayê ma yê herêmkîyan de soz danê ke ma do aştîya komelkî û sistemê demokratîkî awan bikerê. Ma seba karkeranê Merkezê Hemkarîya Cinîyan ê Nudem asanîye wazenê. Ma reyna seba cehd û xebatanê înan sipas kenê Hemşaredara xo rê û endamê meclîsî rê.”
‘Ma do têkoşînî dewam bikerê’
Hemşaredara Farqînî Sevim Biçici zî va ke ê seba 8ê Adare Roja Cinîyanê Kedkaran a Dinya bikelecan ê. “Wa Merkezê Hemkarîya Cinîyan seba her kesî pîroz bo. Ma sey cinîyanê Farqînî do tîya de hem seba ke ciwîyayişê xo azad bikerê, hem zî seba ke reng û vengê xo dîyar bikerê, do têkoşînê xo dewam bikerê.”
Badê qiseykerdişan akerdişê Merkezê Hemkarî û Ciwîyayîşê Cinîyan ê Nudem ame kerdiş.
