Temsîlkarê sazîyê weşîye yê Amedî paştî daye vengdayîşê Abdullah Ocalanî û vatê: “Vengdayîşê Rayberê Şarê Kurd Abdullah Ocalanî vengdayîşê aştî û awankerdişê cuya weşe a. Abdullah Ocalan rayîrê şarê bindest ê azadîye akerd. Aştî seba weşîye bingeyêk a.”
1ê teşrîna verêne de Serekê MHP’yî Dewlet Bahçelî Meclîs de zîyaretê grûba DEM Partî kerd û destê xo Hemserekanê DEM Partî rê derg kerd . Dima waşt ke Rayberê Şarê Kurd Abdullah Ocalan Meclîs de vengdayîş bikero û vajo ke rêxistina xo fesih bikero û çekan verdo. Nê vengdayîşî ser o bi 23ê teşrîna verêne de Wekîlê DEM Partî Omer Ocalan bi nameyê keyeyê xo şî Îmrali û Rayberê Şarê Kurd Abdullah Ocalanî reyde pêvînayîşêk kerd. Demê winasî de Abdullah Ocalanî mesajêko kilmek û xorîn da şarî. Va ‘Tecrîd dewam keno. Eke şert û çarçewa bêrê viraştene, ez hetê teorîk û pratîkî ra amade ya ke zemînê şerî bikera zemînê huqûqî û sîyasî.’
Badê cû bi nameyê DEM Partî yew heyet ame organîzekerdiş û 22ê kanûne û 28ê kanûne de di rey şîyê Îmralî û Abdullah Ocalanî reyde pêvînayîşî kerdî. Rayberê PKK’yî Abdullah Ocalanî pêvînayîşê 28ê kanûne de xerîtaya ke 7 madeyan ra yena meydan, şarî reyde pare kerde û berpirsîyarî daye meclîs, partîyê sîyasî, rêxistinê komelkî û heme beşanê şarî. Badê ke heyet zaf partî û rêxistinan reyde pêvînayîşî kerdî, 27ê Sibate de reyna şî Îmrali û agêra. Na rey Rayber Abdullah Ocalanî beyanatêko sey manîfesto şarî reyde pare kerd. Na roje ra nika rojeva Tirkîya hetta dinya bedilya.
Vengdayîşê Rayberê Şarê Kurd Abdullah Abdullah Ocalanî ser o ê tarîxî ser o temsîlkarê sazîyê weşî yê Amedî paştîdayîşê xo ard ziwan. Serekê Odeya Doktoran ê Amedî Veysî Ulgen û Hemserekê Sendîkaya Xebatkarê Weşîye û Xizmetê Komelî (SES) yê Amedî Mehmet Nur Ulusî ajansê ma rê qise kerd.
‘Vengdayîş pawitişê heqan o’
Hemserekê Şûbeya SES’î yê Amedî Mehmet Nur Ulusî bale ant ser pawitişê cuyayêka bi weşî û wina va: “Seba cuyêka bi weşîye verê ci ganî merdim azad bibo. Ma zî seba aştî û azadîye têkoşîn danê. Ma vengdayîşê Rayberê Şarê Kurd Abdullah Ocalanî zaf pîroz vînenê. Vengdayîşê Rayberê Şarê Kurd Abdullah Ocalanî vengdayîşê aştî û awankerdişê cuyêka bi weşî yo. Abdullah Ocalan rayîro ke şar bi xo bi xo awan biko, da akerdiş.”
‘Wa dewlet bi lezûbez game bierza’
Mehmet Nur Ulus dîyar kerd ke seba şerê Rojhîlatê Mîyanên de bêro vindertiş û aramî bêro herême vengdayîşê Rayberê Şarê Kurd Abdullah Ocalanî zî seba ci îmkanêko zaf gird o û wina va: “Demêko derg Rojhîlatê Mîyan de şerêko dijwar verdewam keno. Seba no şer bêro vindertiş û aramî aver şîro, Abdullah Ocalanî bi vengdayîşo tarîxî nêzdîbîyaşê xo nîşan da. PKK’yî zî game eşt. Pêvajoya wina bizerrî bîye û game eştişî wazenê. Ma zanê ke gamê çareserîye bêrê eştiş do rayîrê aramîye akero. Wa dewlete bi lezûbez gam bierza. Ma zî sey xebatkarê weşîye paştî danê mesajê Abdullah Ocalanî û ma do seba aştîye têkoşînê xo gird bikerê.”
‘Eke aştî nêba komel zî weş nêbeno’
Serekê Odeya Doktoran ê Amedî Veysî Ulgenî zî dîyar kerd ke weşîya komelî bi azadbîyayîşî pê yeno û wina domna: “Ma sey odeya doktoran 30 serrî aştîye ser o têkoşîn danê. Kam rayîrê aştî akero ma do paştî bidê înan. Aştî seba weşîye bingeyêk a.”
