Serekê Komeleya Sêx Seîdî Kasim Firatî vengdayîşê ‘Aştî û Komelo Demokratîk’ yê Rayberê Şarê Kurd Abdullah Ocalan erjna û vat, ”Şarê kurdî zaf bedelê giranî dayî; hinî aştîya bianora ke heq keno û pêkerdişêkê layiqê têkoşînê xo yê seserran wazeno.”
Serekê Komeleya Sêx Seîdî Kasim Firatî vengdayîşê ‘Aştîye û Komelê Demokratîkî’ yê Rayberê Şarê Kurd Abdullah Ocalanî ANF’î rê erjna û nê vatî:
”Şarê kurdî hinî nê zano; têkoşînê xo kerd, wayîrê zanayîş û tecrubeyî yo ke muzakereyî rayra bero. Coka gerek pêro kurdî cayê nê tewirê bianorî de vinderê. Şarê kurdî seserrî yo têkoşînê bianorî rayra beno, bedelan dano. Rixmê nê şertanê giranan şarê ma hema sereberz payra yo û xover dano. Rixmê heme zextan, zehmetîyan peyser game nêerzeno û wayîrê nasnameyê xo vejîyeno. Ewro dinya zî na raştîye vînena. Hinî na mesele bi înkar, kiştiş û îmhayî çareser nêbena. Hinî heq, edalet û tesîsê aştîye bîyo mecbûr. Dinyaya ewro zî nê wazena, şarê kurdî zî nê wazeno.
Ewro merdimî semedê aştîye yenê yewca. Kurdî û muxatabê ci gerek wayîrê nê prosesî bivejê, bi berpirsîyarîye prosesî rayra bêrê. Gerek no rayîr raşt bêro averberdene. Allah û Teâlâ Ayetê Hucurât yê 9ine de wina vano; ‘Eke di hetî pêrodayîş bikerî înan bîyarê werê, eke hetêk neheqîye hetê bînî keno vera neheqî bivejê û bi edaletî aştîye tesîs bikerê.’ Ma zî wina têgêrenê. Gerek ma hem tewrê prosesî bibê hem zî cayê aştîye de vinderê.
Seserrî yo heqê şarê ma yenê binpaykerdene. Gerek hinî na neheqîye werte ra bêro wedaritene. Gerek komelê kurdan bi heme dînamîkanê xo tewrê nê prosesî bibo, Şarê kurdî zaf bedelê giranî dayî; hinî aştîya bianora ke heq keno û pêkerdişêkê layiqê têkoşînê xo yê seserran wazeno. Ma zî paştî danê nê prosesî û veng danê şarê xo ke wa bi sabir û metanetî nê prosesî teqîp bikero.”
