Şaristanê Rayberê Şarê Kurd Abdullah Ocalanî de Newroz yena pîrozkerdiş. Bernameyê Newroze de Hemsereka DBP’yî Çîgdem Kiliçgun Uçar va: “Ma do paradîgmaya Rayberê Şarê Kurd Abdullah Ocalanî bîyarê ca. Nameyê Newroze, Kurdistan de bî nameyê xoverdayişî.”
Şaristanê Rayberê Şarê Kurd Abdullah Ocalanî Xelfetî de Newroze bi sloganî “Raybero Azad Komelo Demokratîk” ame pîrozkerdiş. Warê Newroze de welatijan bi coş û kelecanî govend girewte. Bernameyê Newroze ra Hemserekê DEM Partî Tuncer Bakirhan, Hemsereka DBP’yî Çîgdem Kiliçgun Uçar, birayê Rayberê Şarê Kurd Abdullah Ocalanî Mehmet Ocalan, wekîlê DEM Partî, hemşaredar, dayîkê aştî û xeylê welatijî beşdar bîyê.
Do no adir her tim biveşo
Hemsereka DBP’yî Çîgdem Kiliçgun Uçar bername de qisey kerd.
Hemsereka DBP’yî Çîgdem Kiliçgun Uçar wina qisey kerd: “Merheba şarê ma yo erjîyaye, dayîkê ma yê bi rûmetî, ciwanê Kurdistanî şima bi xêr ameyê û çiman ser ameyê. Newroza ma pîroz bo, ma bi xêr dî sar û komê ma. Sima pêro xêr ameyê, Newroza ma bimbarek bo. Newroz rûmet û konbezin a, konbezin zî koye de çîçegêk a. Binê xo ra çîçega xo kena derg, verê xo açarnena Roje rê. Sarê kurdan sey konbezinêk bî, verba zordarîye de sere hawana û vatênê xo ard ziwan. Coka do no rayîrşîyayîşê ma bireso azadî, bireso aştîye.
Ma hetanî nika bi felsefeya Rayberê Şarê Kurd Abdullah Ocalanî Newroza xo kerde gandar. Ma ked û emegê embazê xo, qet xo vîr nêkenê. Cografyaya Mezopotamyayî zaf qewimyayîşê avzelî ra şahîdî kerd. Na cografya de şaristan û dewletê ewil ronîyayê. Mezopotamya de sifte hîsanê merdimeyîye ameyê nuştişî. Çi heyfo ke Mezopotamya qralê zalimî zî dî. Verba nê qralê zalimî zî xoverdekarî zî vejîyayê orte. V.Î. serra 621î de Kawayo Asinkar embazanê xo reyde Dehaqo Zalim binvist û a serre ra heta nika kurdan 2000 serrî yo ke Roşanê Newroze pîroz kenê. Şarê kurd adirê Newroze xo rê kerd adirê têkoşînî, do qet adirê Newroze xo ra nêşîro. Hetanê şarê kurd, cinî û şarî azad nêbî do no adir her tim biveşo û ma rê bibo hêvîye.
Dinyayêka azade pêşnîyaz kena
Nameyê Newroze, Kurdistan de bî nameyê xoverdayîşî. Tarîxê Newroze kurdan rê bî sey rayberêk, adirê Newroze zî kurdan rê bî sey Roje. Na Roje zî dinya ra roja 27ê sibate de dinyayêka cîya, azade pêşnîyaz kena. No vengdayîş her kesî rê yo, ganî ma nê vengdayîşî berz û gird bikerê. Birêz Ocalan serra 1973î de Enqere de demo ke embazê xo reyde têkoşînê xo da destpêkerdiş, vano ke; ‘21ê Adare cuyêka azade de israr o. Eke cuye biba ganî azad biba.’ Hem şarê kurd hem ciwan û cinîyê kurd bi têkoşînê xo no vengdayîş berz kerd.
Seba no vengdayîşî ma Newroza xo bi coş û kelecanî pîroz kenê. Xelfetî şaristanêk seba pîya cuyayîşê şaran rê modelêk o, Xalfetî de şar bi nasname û ziwanê xo ame têhet. Ma zananê ke no serkewtişî de zî fikir û ramanê Birêz Abdullah Ocalanî est ê. Xelfetî ra fikrê pîya cuyayişî Kurdistanî ra vila bî. No vilabîyayîş zî 27ê sibate de hîna bî hera û gird. Nê vengdayîşî de sîyaseto demokratîk est o, Xelfetî zî merkezê sîyasetê demokratîk o.
Feraset û paradîgmaya ma pergalê hemserekîye qebul keno. Pergalê hemserekîye nîşan da ke çareserîya probleman de wayîrê rol û mîsyonî yo. Vengdayîşo bîn ê Birêz Ocalanî komelo demokratîk o. Cografyaya ma hetê ziwan û kulturî ra zaf zengîn a. Ganî gama ewil a vengdayîşo tarîxî Xelfetî ra bêra eştiş, ma seba caardişê nê vengdayîşî amade yê. Azadîya şarê kurd do bi Newroze tacîdar biba. Sûrîye de pêameyîşo tarîxî bi bedeldayîşê kurdan ame na roje, ewro Rojawan têna nê pêroyîya Sûrîye de do paradîgmaya xoserîya herême ca biga. Çimê şaranê Sûrîye wa roşin bo, çimkî do Hêzê Demokratîke yê Sûrîye (HSD) heqanê şima bipawo. Sûrîye de êdî dewlete yewperest nê dewleta demokratîk do biba, ez Newroza şima pîroz kena. Ma do paradîgmaya Rayberê Şarê Kurd Abdullah Ocalanî bîyarê ca. Û Dayîka Sakîne zî vîr ana. Çimkî Sakîne Ana seba têkoşînê zaf bedel da, 7 domanê xo vînî kerdê. Ma soz danê dayîkan ke ma do aştî bîyarê nê welatî. Newroza ma firaz bo.”
