Verfekê Rayberîya Xoser a Demokratîke Xalid Omer derheqê pêameyîşê mabenê HSD û Hukmatê Demkî yê Sûrîye de ame îmzekerdiş dîyar kerd ke no pêameyîşêko tarîxî yo û va: “Bi no pêameyîş do êdî statuyê şarê kurd nas bibo û edî hêrişê Dewleta Tirk yeno maneyê hêrişê Sûrîye kena.”
Fermandarê Pêroyî yê Hêzê Sûrîyeya Demokratîke (HSD) Mazlum Abdî û Serekkomarê Demkî yê Sûrîyeye Ehmed Şara 10ê Adare Şam de pêvînayîşêk pê ardê. Dima pêvînayîşê Mazlum Abdî û Ehmed Şara ser 7 xalan pêmaeyîşêk îmze kerdê. Pêameyîş de ame destnîşankerdiş ke do heme Sûrîye de adirbest bêro îlankerdene û şarê kurd zî mîyanê Sûrîye de ca bigê.”
Verfekê Rayberîya Xoser a Demokratîke Xalid Omer derheqê pêameyîşî de ajansê ma rê qise kerd.
Ser muhîmîya pêamayîşê Hemverfekê Rayberîya Xosere Xalid Omer ard ziwan ke no pêameyîş tarîxî yo û wina va: “Tarîxê şarê kurd ê Kurdistanê Rojawanî de destpêkerdişê merheleyêka newe yo. Eke no pêameyîş bikewro merîyetî do netîceyê weş bi xo ra bîyaro. Seba ke Dewleta Sûrîye kesayeta serekkomar de Rayberîya Xoser nas kena. Armancê ma zî o yo ke Rayberîya Xoser, destkewteyê ma hetê hukmatê merkezî ra bêro naskerdiş. Seba ke ê ma nas bike heme dewletê dinya zî do ma nas bikê. Seba ci zî gamêka tarîxî ya û do statuyê şarê kurd û heme şarê Sûrîyeya Rojhilat û Bakûrî misoger bikero.”
Pergalê netewa demokratîke
Xalid Omer no pêameyîş sey destpêk name kerd û wina domna: “Qirkerdişê ke verba şarê elewîye sûcê merdimîyîye yo. No pêameyîş verê qirkerdişan zî bigo. Ser babete nîqaş ame kerdene, waştişê Birêz Mazlum Abdî zî o bî ke nê hêrişê Lazkiye û Tarsusî bivinderê. Goreyê nê pêameyîşî demo ke HSD beno beşêk artêşê Sûrîye yê fermî, no dem heqê ci beno ke mudaxaleyê nê qewimyayîşan bikero. Demo ke temsîlkarê HSD’î rayberîya konseya lejkerî de estbî do bandorê xo ser qeraran zî biko.”
Pêameyîşê vendayîşo tarîxî ra qut nîyo
Omer wina qedîna: “No pêameyîş, vengdayîşê Rêzdar Abdullah Ocalan ê 27ê Sibate ra qut nêgênê dest. No pêameyîş, netîceyê nê vengdayîşî yo. Nika ke demê HSD’î bikewo mîyanê sazîyê dewlete yê fermî eke Dewleta Tirk hêrişê herêmê ma bikera, yeno maneyê hêrişê Sûrîye kena. No dem lazim o ke Şam pawitişê herême biko ya zî dîplomasî rê verê nê hêrişan bigo. No ser zî herêma de bandorê nê pêameyîşî do bibo.”
