Hemsereka DBP’yî Çîgdem Kiliçgun Uçar pîrozkerdişê Newroza Hezexî de qisey kerd û qirkerdişê ke Kobanê de vera yew keyeyî virazîya protesto kerde. Çîgdem Kiliçgun Uçar va: “Wa na Newroze biba wesîleya azadîya rêzdar Ocalanî.”
Vakûrê Kurdîstan û Tirkîya de bi sloganî “Raybero Azad Komelo Demokratîk” 89 merkezan de Newroze yena pîrozkerdiş. Çarçewaya pîrozkerdişê Newrozan de qezaya Hezexî ya Şirnexî de bi pêşengîya Partîya Herêmanê Demokratîkan (DBP), Tevgerê Cinîyanê Azadan (TJA) û DEM Partî de, Newroze yena pîrozkerdiş. Pîrozkerdiş Meydanê Newroze yê qezayî de virazîya û bi hezaran kesî beşdar bîyî. Hemsereka Pêroyî ya DBP’yî Çîgdem Kiliçgun Uçar, Hemverfeka DEM Partî Ayşegul Dogan, parlementerê DEM Partî yê Şirnexî Newroz Uysal Aslan, Mehmet Zekî Îrmez, hemşaredara Mêrdinî ya Şaristanê Girdî Devrîm Demîr tewrê pîrozkerdişî bîyî.
Cinîyan meydanê Newroze xemilna
Şarê Hezexî bi cil û belganê Kurdkî û xemlanê kesk, sûr û zerdan vera meydanê Newroze şîyî. Welatijan bi girewtişê govende dest bi pîrozkerdişî kerd. 7 serran ra heta 70 serran domanî, cinî, pîl û ciwanî beşdarê Newroze bîyî û meydanê Newroze bi cil û belganê xo xemilna. Verê ke bername dest pêbiko welatijan meydanê Newroze de bi coşêko gird govend girewte. Dima qiseykerdişî ameyî kerdene. Programî Newroze bi rêzgirewtişî seba kesanê ke têkoşînê azadî û demokrasî de cuya xo vindî kerda, dest pêkerd. Rêzgirewtişî de şarî bi yew venge sirûd “Çerxa Şoreşê” wende. Endamê Meclîsê Ciwananê DEM Partî seba vîrardişê Kemal Kurkutê ke Newroza 2017î ya Amedî de hetê polîsan ra ame kiştene, pankarto ke nuşteyê “Ti vilîkê wesarî yê ke hema neabîyayê Kemal Kurkut” girewt.
Dayîkê Aştî boranê sipî firrnayî
Badê rêzgirewtişî endamê Meclîsê Dayîkanê Aştî şarî silam kerd û bi firrnayîşê borananê sipîyan mesajê aştî da. Ayşe Hezer nameyê Dayîkanê Aştî ser o qisey kerd. Ayşe Hezerî ard ziwan ke a Newroze pîroz kena û va: “Ez Newroza heme girewteyan pîroz kena. Ma vanê mesajê rêzdar Ocalanî do aştî û azadîye bîyaro. No mesajê aştî, azadîye û seypêyî ya.” Şarî zî bêmabên sloganê “Bijî Serok Apo” berz kerd.
‘Ma piştî danê vengdayîşê Aştî û Komelo Demokratîkî’
Hemserekê DBP û DEM Partî yê Şirnex û qezaya Hezexî, parlementera Şirnexî Newroz Uysal Aslan, Mehmet Zekî Îrmez û hemşaredarê Hezexî Dogan Adilbelî vejîyayî sehneyê ser o û şar silam kerd. Badê silamdayîşî Hemşaredara Mêrdînî Devrîm Demîr qisey kerd û ard ziwan ke adirê Kawayê Hesînkarî na roje bi hêvîyêka girde geş beno û wina va: “Ewro heme dinya behsê têkoşînê Kurdan keno. Vengdayîşo seserrî ke estbîyayîş û çinbîyayîşê Kurdan dîyar keno, ame kerdiş. Ma piştî danê vengdayîşê Aştî û Komelo Demokratîkî yê rêzdar Abdullah Ocalanî. No vengdayîş seba heme şar û bawerîyan o. La êdî ganî ser şarê Kurdî ser o bombayî nêrê varnayene. Ma venga rayberê dewlete zî danê ke game bierzê. Êdî dora dewlete ya ke game bierza.”
‘Ganî verê cû berê Girawa Îmraliyî bêrê akerdene’
Aysegul Dogan zî pîrozkerdişî de qisey kerd û bi vatişê “Newroza Serok Apo zî bimbarek bo” dest bi qiseykerdişê xo kerd û nê çîyî ardî ziwan: “Newroze seba ma Kurdan tena roja yew roşanî nîya. Newroze seba ma Kurdan xonewekerdene û çareserî, aştî û cuyêka newe ya. Şarê Kurdî yew hetê ra keyfweş o û hetêko bîn ra zî xemgîn o. Ewro zî rojêka winasîn a. Vizêrî vîrardişê qirkerdişê Helebçe bî. Ewro xeberêk Kobanê ra ameye. Heme Kurdî seba Kobanê xemgîn ê. Çunke uca keyeyêk ameyo bombebarankerdene û qetilkerdene. Ma bi hewayêko zelal aştî wazenê. Ma seypêyî wazenê. Ma qebûl nêkenê ke Kurdî bêrê kiştene. Mesajê ma zelal o. Destêkê ma de gul û destêko bîn de bomba çin a. Her di destê ma zî seba aştî akerde yê. Kesê ke Kurdan reyde aştî virazenê wa êdî Kurdan nêkişê. Ma qebûl nêkenê. Ma kiştiş û bombebarankerdiş rê vanê êdî bes o. Rayîro ke hetê rêzdar Ocalanî ra ame viraştene, seba heme şaranê Rojhelatê Mîyanênî yo. Wa bizanê ke a nexşeraye tena seba şarê Kurdî nîya, temînatê estbîyayîşê heme şaran a. Ganî herkes piştî bido vengdayîşê rêzdar Ocalanî. Ganî verê cû berê Girawa Îmraliyî bêrê akerdene. Felsefa Jin Jîyan Azadî do aştî û seypêyî bîyaro na erdnîgarîye.”
‘Adirê Newroze Botan de tim geş bî’
Dima Hemsereka Pêroyî ya DBP’yî Çîgdem Kiliçgun Uçar qisey kerd. Çîgdem Kiliçgun Uçar zî Newroza şarî pîroz kerd û wina qisey kerd: “Adirê Newroze tewr zêde Botan de geş bî. Botan bî nîşaneyê xoverdayîşê Newroze. Netîceyê nê xoverdayîşî de ma eşkenê ewro nê meydananê Newroze de pîrozkerdiş bikerê. Mazlûm Doganî hepisxane de vera çinhesabnayîşê şarê Kurdî xo kerd Newroze. No adir xoverdayîşê ey reyde geş beno û heme Kurdistanî vila beno.”
‘Ma hêrişê Kobanê qebûl nêkenê’
Çîgdem Kiliçgun Uçar bale ant qetilkerdişê keyeyêkê Kobanê ser o û wina va: “Ma qebûl nêkenê. Vera nê vengdayîşê tarîxî no bombebarankerdiş nêyeno qebûlkerdiş. Ganî rayberê dewlete vejîyê teber û beyanete bidê. Bi mîlyonan Kurdan piştî da vengdayîşê rêzdar Ocalanî. La şima wirzenê qirkerdişan kenê. Ganî faîlê qirkerdişê Kobanê vejîyê orte. Şarê Kurdî Kobanê de binê tehluke de yo. Nê prosesî de no qirkerdiş nêyeno qebûlkerdiş. Ma qebûl nêkenê. Hukmat tena wa şarê Kurdî rê biewnîyo, do bizano çi keno. Ma bi hêrişan nêqedînayî. Vernîya ma vera vengdayîşê Abdullah Ocalanî ya. Ma vanê heme şaranê Tirkîya ganî vernîya xo bido nê vengdayîşî. Yan ma do têduşte biciwîyê yan zî no inkar do dewam biko. Înkar êdî Kurdistanî de bêmana yo. Şarê Kurdî vano ez do welatê xo de azad biciwîya. Vengdayîşê rêzdar Ocalanî vera inkarî seba heme kesan azadî û seypêyî yo.
‘Azadîya Abdullah Ocalanî’
Hezex cayêko muhîm o. Serranê 1990î de yew cayê ke tewr zêde kiştişanê ke faîlê înan dîyar nêyê, tede qewimîyayî. Ma reyna keyeyo ke Kobanê de cuya xo vindî kerda bi rêzdarî xo vîr anê. Wa na Newroze biba wesîleyê azadîya rêzdar Ocalanî û aştî.”
Şarî zî meydanî de sloganî “Şehîd nêmirenê / Şehîd Namirin” eşt. Badê qiseykerdişan adirê Newroze bi vatişê slogananê “Bijî Serok Apo” û “Newroze pîroz bo / Newroz pîroz be” ame wekerdene. Tewr peynî de zî deyîrbaz Mizgîn Tûran sehne girewt û deyîrî vatî. Pîrozkerdişê Newroze bi vatişê deyîr û girewtişê govende qedîya.
