Cinîyanê Dêrsimijan Beser Beydîllî, Zulfîye Dogan û Şerîfe Demîre terba Kadir Bulutî maneyê Çarşeme ya Şîyaye ajansê ma (AW) rê qesî kerd. “Çarşeme ya Şîyaye esasê xo ra Newroz o, sarê serre yo, sarê wisarî yo.
Şarê Dêrsimî semedê roja bimbareke Çarşeme ya Şîyaye şî serê zîyara Gola Çetoyî çeraxî vîstî ta û loqmeyê xo parekerdî.
Gorêyê yîtîqatê şarê Dêrsimî aşma gucige sey “Aşma Xizirî” zî yena zanitene. Aşma gucige ra dime aşma adare ke dest kerd ci hîrê çarşemeyê verênê sey “Çarşeme ya Şîyaye” yenê qebul kerdene.
No adet o ke seserrano serê nameyê Çarşeme ya Şîyaye xo dano dewamkerdene sey Newroze, sey sarê wisarî zî yeno qebul kerdene.
Çarşemeya Şîyaye de keyeyan de, serê zîyar û dîyaran de çeraxî yenê tafîştayene, qurbanê yenê kerdene û loqmeyî yenê vilakerdene.
Şarê elewî û zafêrî zî elewîyê Dêrsimî vazenê ke pê nê loqmanê înan pê nê gulbanganê înan serre rind bêro, rind ravêro, xirabîye durî şêro.
Mekanê Zîyara Gola Çetoyî cayo ke Awa Mûnzûrî û Awa Pulemûrîye resenê pê o mabên de ra. Şarê Dêrsimî semedê roja bimbareke Çarşeme ya Şîyaye şî serê zîyara Gola Çetoyî çeraxî vîstî ta û loqmeyê xo parekerdî.
‘Rindîye bêro, xirabîye durî şêro’
Cinîyanê Dêrsimijan Beser Beydîllî, Zulfîye Dogan û Şerîfe Demîre terba Kadir Bulutî maneyê Çarşeme ya Şîyaye ajansê ma (AW) rê qesî kerd.
Beser Beydîllîye kilmekî seba na roje vîna va: “Seba ke Heq jûya xêre bido kesî bê rizqat nêvirdo. Seba xêre, seba rindîye yenîme îta.”
Zulfîye Doganê zî seba na roja bimbareke zanitena xo vîna arde ziwan: “Bî wisar ma loqmanê xo qurbananê xo gênîme yenîme îta. Çila vêşnenîme, dûwanê xo kenîme. Çarşemeyo Şîya vanîme cira, ama esasê xo ra Newroz o.”
Şerîfe Demîre zî vana pîyê mi wexto ke bîyêne wisarnan şîyêne mîyanê birî de ju darê çolixe vetêne ardêne. Adirde kerdêne çewt kerdêne çolixe, dima ra zî paç û layê renginî cira dênê girê û berdêne dês ra darde kerdêne. Vatêne wa xirabe, çetinîye mara durî şoro. Şerîfe Demire vatena xo wîna dê ramitene: “Qere Çarşeme 21ê Adare de ro. Na roje de çixas dar û ber estê çewtê hardî benê, şonê secde. Teyna dara qerace çewt nêbena. Çike gilê ayera turikê jû feqîrî dardekerdo. Eke çewt bibo turikê feqîrî ra loqmeyê xo gineno hard ra. Bê dara qerace çixas dar û berî estê yenê secde, ruyê xo kenê hard ra û rizatîya hardî gênê hona benê kewe.
Kal û pîranê ma maneyê Qere Çarşemeyî nîya vatêne. Loqmeyî kerdêne vila, dûwayî kerdêne ke serre rind bêro. Wisar bi bereketê xo bêro. Hegayê ma, genimê ma, cewê ma rind bêrê. Yanê vêşanîye nêro.”
