Adirê Newroze Torontoya Kanadayî de zî gir bî. Kurd û dostê kurdan Toronto de zî kom bîyê û Newroze bi meşaleyan pîroz kerde. Pîrozbayî de silam da vengdayîşo tarixî yê Rayberê Şarê Kurdî Abdullah Ocalanî.
Ciwanê Kurdî şaristanê Torontoyê Kanadayî de bi coşêko pîl Newroze pîroz kerde. Ciwanî Merkezê Komelo Kurdî yê Demokratîkî de kom bîyê û bi fîşekanê hewayî û wekerdişê adirî Newroze pîroz kerde. Pîrozbayî deqeyêk rêzgirewtişî reyde dest pêkerd û bêmabên sloganî “Bijî Serok Apo” ame vatene. Nameyê Meclîsê Şarî yê Kurdî ser o qiseykerdiş ame kerdene û ame dîyarkerdene ke şarê kurdî kamca de beno wa bibo, her tim erjanê xo paweno. Qiseykerdişî de Rayberê Şarê Kurdî Abdullah Ocalan ame vîrardene û wina ame vatene, “Paradîgmaya Rayber Apo musna ma ke Newroze rayîrê hişyarbîyayîş, serewedaritiş, xoverdayîş û serkewtişî yo. Azadîya Rayber Apo azadîya ma hemînan a.” Qiseykerdişî de ame dîyarkerdene ke ê do wayîrê vengdayîşê Rayberê Şarê Kurdî Abdullah Ocalanî vejîyê.
Pîrozbayîya Newroze ya merkezî ya ke do Kanade de bêro kerdene, do 23ê adare de bêro kerdene.
Malûmatê derheqê pîrozbayîya merkezî de wina yê;
Tarix: 23ê Adara 2025
Saete: 15:00 (goreyê wextê Torontoyî)
Adres: 2638 Steeles Ave. E. Brampton-Toronto
