Meclîsê Cinîyan yê DEM Partî dimayê vengdayîşê “Aştî û Komelo Demokratîk”î zîyaretê ke dayê destpêkerdene, dewam kenê. Na çarçewa de ewro Heyetê Polîtîkayanê Cinîyan yê Gelecek Partî reyde pêvînayîş ame kerdene.
Meclîsê Cinîyan yê DEM Partî vengdayîşê “Aştî û Komelo Demokratîk” yê Rayberê Şarê Kurdî Abdullah Ocalanî ke 27ê sibate de kerd, ey ra pey zîyaretê ke rêxistinanê cinîyan reyde dayê destpêkerdene, dewam kenê. Çarçewaya nê programî de cinîyê DEM Partîyîjî Heyetê Polîtîkayanê Cinîyan yê Gelecek Partî reyde ameyê têhet.
Pêvînayîşo de ke Merkezê Pêroyî yê Gelecek Partî de ame kerdene Verfeka Cinîyan ya DEM Partî Halîde Turkouglu, Parlamentera Stenbolî Ozgul Sakî, Endama Heyetê Rayberdişê Peroyî û Koordînasyonê Cinîyan Canan Çalagan tewrê ci bîye. Heyetê Gelecek Partî de zî Hetkara Sereka Pêroyî ya Polîtîkayanê Cinîyan Dr. Yeşîm Karadag, Endama Heyetê Rayberî û Parlamentera Denîzlî Sema Silkîn Un, Hetkara Serekê Pêroyî ya Berpirsîyarê Heqanê Merdiman Av. Seyrangul Neslîhaoglu û Sekretera Pêroyî ya Serekîya Polîtîkayanê Cinîyan yê Merkezê Pêroyî Zeynep Ceylîn Ecer ca girewt.
Heyetê Gelecek Partî heyetê DEM Partî verê berî de pêşwazî kerd. Derheqê pêvînayîşo de ke bêçapemenî ame kerdene Halîde Turkoglu qisey kerd û vat: “Beno ma zaf babetan de eyn çîyî nêfikirîyê la ame vatene ke dîyalog û muzakere muhîm ê û nê heme ganî sîyasetî ra dest pêbikê.” Reyna pêvînayîşî de ame vatene ke babetanê aştî û demokratîkbîyayîşî de hewcedarî bi dîyalogî est a.
