Endamê Meclîsê Ciwanan ê DEM Partî Yusuf Elîş dîyar kerd ke turnuvaya ke nameye Rojîn Kabaîşe ser o ameya organîzekerdene do 10ê hezîrane de dest pêbikero û veng da heme ciwanan, taybetî cinîyanê ciwanan ke beşdarê turnuva bibê û bi rêxistinbîyayîşê xo vera şerê taybet vinderê.
Meclîsê Ciwanan ê DEM Partî yê Amedî, bi sloganê “Ciwanê ke vera şerê taybetî komunan de xo rêxistin kenê, waran de yê” nameye Rojîn Kabaîş ser, turnuvaya Futbol û voleybolî organîze kenê. 17ê gulana 2026 de deklerasyonê turnuya amebi eşkerakerdene û hema zî muracatê turnuva dewam kena. Muracatê turnuva do hetanî 1ê hezîrane dewam bikero.
Turnuvaya ke nameyê Rojîn Kabaîş ser o bêro organîzekerdene do 10ê hezîrana 2026 de dest pêbikero. Derheqê muracat û vengdayîşê tewrbîyayîşê turnuva de endamê Meclîsê DEM Partî Yusuf Elîş ajansê ma rê qisey kerd.
‘Ciwanî bingeyê komelî yî’
Yusuf Elîş îfade kerd ke dewlete, Kurdîstan û metropolanê Tirkîye de ciwanan ser o şero taybet rayra bena û vat: “Dewlete hendî herindê şerê fîzîkî ra, zafêrî şerê taybetî rayra bena. Bi rayîrê madeyê kungkerdiş û fuhuşî ciwanan taybetî cinîyanê ciwanan kontrol kenê. Dewlete, bi nê polîtîkayanê xo wazena ciwanan bê îrade verdo û komelî ra dûrî fîno, şexsan de ferdîtî awan bikero. Nê semedî ra zî taybetî ciwanan hedef gêna; la ciwanî bingeyê komelî yê. Demo ke ciwanî rêxistinbîyayîşê xo xurt bikerê, komel zî xurt beno. Xora dişmen zî nê çî ra tersen o. Coka bi polîtîkayanê lêşinan ciwanan ser de şina. Nê polîtîkayanê lêşinan ra yew zî warê sporî de bikar ana. Dewlete bi rayîrê nê çî zî wazena ciwanî goreyê waştişê sîstemê kapîtalîstî têbigêrê.
Sporêko komelkî
Yusuf Elîş dîyar kerd ke vera nê polîtîkayanê dewlete, nameyê Rojîn Kabaîş ser bi sloganê “Vera şerê taybetî ciwanî meydanan de yê’ turnuvaya futbol û voleybolî da dest pêkerdene û wina dewam kerd: “Ma wazenê ciwanî xo bi xo cuya xo awan bikerê û sporêko komelkî aver bikewo. Seke yeno zanayîş Rojîn Kabaîş embazêka wendekar û kurde bî. Dişmen bi polîtîkayanê xo yê lêşinan embaza ma qetil kerd û hema zî faîlê aye nêameyo vînayene. Mê baş zanenê ke no çî taybetî bi destê dewlete yeno nimitene û pawitene. Ma sey ciwanan wazenê vajê, ma şopdarê dewaya Rojîn Kabaîşe yê û ma do bi hêz, bi hawayêko rêxistinkerdene hesab bipersi û ma nêverdenê na hedîse û nameyê embazan bêro vîr ra kerdene. Ma do her tim paştî bide keyeyê înan.”
‘Vera şerê taybetî beşdarê turnuva bibê’
Sewbîna endamê Meclîsê Ciwanan ê DEM Partî Yusuf Elîş îfade kerd ke nêzdîyê 10 rojano ke muracatê turnuva yena girewtene, heta nika nêzdîya 30 taximî ameyê awankerdene û vat: “Hetê ciwanan ra eleqeyêko gird est o. Hema zî muracatî yenê kerdene. Ma wazenê ciwanî ma zî çîyanê winayinan reyde eleqedar bibê. Muracatî hem merkezê DEM partî de û hem zî qezayan de dewam kenê. Kesê ke biwazê taximanê xo awan bikerê, hem bi rayîrê merkezî û qezeyanê DEM Partî yê Amedî û hem zî eşkenê medyaya dîjîtal ser o xo biresnê ma. Ma veng danê heme ciwanan taybetî cinîyanê ciwanan wa taximê xo awan bikerê û beşdarê na turnuva bibê. Ma bi rêxistinbîyayîşêko xurt vera polîtîkayanê taybetî vinderê û vajê şero taybet nêyeno qebulkerdene û ma nêverdenê ma ser o bêrê rayra berdene.”
