Konferanso de ke Parlamentoyê Ewropa de yeno kerdene beşdaran bale ant vengdayîşê tarixî yê Abdullah Ocalanî ser o û vat: “Ganî Tirkîya ca de berpirsîyaranê xo bîyara ca. Abdullah Ocalan hema zî muxataban gêreno.”
Konferansê 19. yo ke “Yewîya Ewropa, Tirkîya, Rojhelato Mîyanên û Kurdî” Parlamentoyê Ewropa (PE) de yeno kerdene, roja dîyîne de dewam keno. Roja dîyîne yê konferansî de roniştişê “Tirkîya û Sîstemê Dinya yê Newe” de dewam keno. Roniştişî de ke hetê akademîsyen Latîfe Akyuz ra ame rayberdene, rojnameger Ferda Çetîn, Parlamenterê Stenbolî yê CHP’yî Sezgîn Tanrikulu, Unîversîteya Vîyana ra Huseyîn Çîçek, Unîversîteya Wagenîngenî ra Joost Jongerdene qisey kerd.
‘Vengdayîşê Ocalanî seba çareserî sey Manîfesto yo’
Sezgîn Tanrikulu ewil qisey kerd û dîyar kerd ke rîyê operasyonê vera Şaredarê Stenbolî yê Şaristanê Girdî Ekrem Îmamoglu ra nêeşkayo tewrê konferansî bibo, coka Anqara ra bi hewayêko onlîne tewrê ci bîyo. Sezgîn Tanrikulu ard ziwan ke seba çareserîya meseleyê kurdî Vengdayîşê Rayberê Şarê Kurdî Abdullah Ocalanî yê 27ê sibate sey manîfesto yo û vat: “Rêxistine zî cewabêko pozîtîf da û no proses derbasê qonaxêko cîya bî. Labêlê AKP û îkqtîdar heta nika berpirsîyarîya xo nêarda ca. Eksê ci zilm kerd. Seba ke rêxistine bieşka kongreya xo bikera, herinda ke helwestêka asankarîye nîşan bido, çîyê eksê ci keno.”
‘Ocalan 25 serrî yo seba aştî muxatab gêreno’
Joost Jongerden nê çîyî ardê ziwan: “Tirkîya de herinda meseleyê kurdî problemêko Tirk yê 100 serrî est o. Ganî ma nê ser o qisey bikerê. Seba çareserîya nê problemî vengdayîşê Abdullah Ocalanî tarixî yo. Ganî heme hetî goş bidê nê vengdayîşî. Seba aştî ganî lazimtîyê vengdayîşî bêrê ca. Seba ke serra 2009î de mabênê PKK û Tirkîya de prosesêk dest pêkerd. Bi hewayêko negatîf netîce ameye girewtene. Seba ke na rewşe reyna nêqewimîya, ganî rayîrê resnayîşî bêrê akerdene. Ganî Abdullah Ocalan û rayberê PKK’yî bieşkê pêvînayîşan bikerê. Ganî dewlete berpirsîyarîyanê xo bîyara ca. Ez hêvî kena vatişê Abdullah Ocalanî ‘Ez muxatabêk gêrena’ yê 25 serrî yo ke kerdo, na reye bêro ca û muxatabêk bivîno. Ez vengdana welatanê Yewîya Ewropa ke PKK’yî lîsteya terorî ra vejê.”
