Prof. Dr. Cengiz Aktaro ke munaqeşeyê proses û dîyalogî erjnayî, ard ziwan ke îqtîdarî semedê waştişanê kurdan îradeyo sîyasî nêmojnayo û vat gerek hukmat geme bierzo.
Vengdayîşê tarîxî yê Rayberê Şarê Kurdî Abdullah Ocalanî yê 27ê sibate û îlankerdişê qerarê adirbestê yê PKK’yî yê 1ê adare aşmêk xo dima verdayo la hema zî hukmatî gamêka pête nêeşta. Hetê bînî ra şertanê Rayberê Şarê Kurdî Abdullah Ocalanî yê Îmraliyî de qet bedilîyayîşêk nêameyo kerdene.
Universîteya Akdenizî ra Profesor Dr. Cengîz Aktarî derheqê averşîyayîşê Sûrîye û munaqeşeyanê proses û dîyalogî yê Tirkîya de ajansê ANF’yî rê qisey kerd.
Cengiz Aktarî averşîyayîşê Sûrîye sey kaosî pênase kerd û wina vat: “Tirkîya wazena herême de qereqolan rono la Îsraîlo ke hêzê Amerîka girewto peyê xo vera nê projeyî yo. Îsraîl nêwazeno Tirkîya Sûrîye de bimana. Hema dîyar nîyo ke kam îdareyê Ahmed El-Şara ser o do dahîna zaf tesîr bikero.”
Aktarî bale ant qiseykerdişê Hemsereka Konseya Rayberdişî ya KCK’yî Besê Hozat ser o û nê vatî: “Îqtîdar vano ke ez do çîyêk nêda. Xora çîyêk zî nêdayo. Qendîl zano no çîyo. Eşkerayîya peyên ya Besê Hozat zaf eşkera û zelale bîye. Îqtîdar semedê caardişê waştişê kurdan îredayo sîyasî nêmojneno.”
Cengiz Aktarî wina dewam kerd: “Îqtîdar game nêerzeno çunke dest û lingê ci giredaye yê. Xora vat ê nêeşkenê. Vengdayîş keno la peyê ci de nêvindeno. Îqtîdarê antîdemokratîkî ra nêyeno pawitene ke gamanê semedê heqanê merdiman û demokrasîyî bierzo.
Mîtîng û çalakîyanê de ke semedê Îmamogluyî yenê kerdene dişmenîya vera kurdan est a. Pêro nêbî zî qismêk dişmenîya kurdan keno. Yanî Tirkîya de topyekun yew muxalefet çin o.
Qederê Devlet Bahçeli û Tayyîp Erdoganî yew o. Nîyetê înan çîn o ke bi weçinîtişî îqtîdarî caverdê. Xora caverdayîşê înan zî mumkun nîyo. No şebekeyêkê sûcî yo. 20 serrî yo çîyê ke teberê qanûnî yê ke înan nêkerdê nêmendê. Ê zî zanê ke eke îqtîdar bibedilîyo, ê cade yenê tepiştene.”
