Yew ciwanê enternasyonalîst endama Tora Ciwan Tarîxî Nusenê Flora Vitoux ke Fransa ra beşdarî meşê ciwanan bî, dîyar kerd ke wa ciwanî xo zafêr bi rêxistin bikerê û va: “Persfektîfê Serek Apo eşkeno rayîrêkî nîşanî ciwanan bido.”
Meclîsê Ciwanan ê DEM Partîye bi wesîleya 76. rojbîyayîşê Şarê Kurd Abdulalh Ocalan çar roj ê bi şiara “Bi Komelo Demokratîk Ma Ver Bi Azadîye” meşîyenê Amarayî. Meşyoxî roja 4. de verê awanîya DEM Partîye ya Xelfetî ra bi meş kewtê warê festîvalî. Ciwanan meş de bêmîyan dirûşmeyê “Bijî Serok Ap”, “PKK gel e gel li vir e”, “Li çiyan negerin Apocî li her derê ne”, “Kurdistan goristan ji bo faşistan” berz kerdê. Girse warî de bi coşo xurt ciwanan pêşwazî kerdê. Ciwan û girse warî ra kewtê milê yewbînan govend gêrînayê. Ciwanan dima zî meşe xo 4ê Nîsane, Amara de qedînayî.
Yew ciwanê enternasyonalîst endama Tora Ciwan Tarîxî Nusenê Flora Vitoux ke Fransa ra beşdarî meşê ciwanan bî; derheqê meşî, 4ê Nîsane, kampanyaya azadîye ya seba Rayberê Şarê Kurd Abdullah Ocalan ameyo destpêkerdiş û vengdayîşê ci yê 27ê Sibate de ame kerdene ajansê ma rê qise kerd.
‘Hetkarîya şarî zaf a’
Flora Vitoux da zanayîş ke hetê Meclîsê Ciwanan ê DEM Partîye ra seba meşî ameya dawetkerdene û wina va: “Ewilî beşdarî Newroze bîya, dima zî destpêkê meşî ra nika embazan xo reyde meşîyena. Ma zî Ewropa ra meşîyenê, seba mi balkêş bî ke Kurdisan de komê cîya bi cîya rêxistin ê. Seba ma bi xususî çikê cîya no bî ke heme şarî ewta çiqas hetkarî danê hereket û partîya kurd, hetkarîya şarî zaf a.”
Kurdistan û Ewropa cîya yê
Flora Vitoux qalê pêvajoya meşî kerd û wina domna: “Her çiqas behsê pêvajoyêk bêro kerdene zî ma vînenî ke polîs çiqas tundî şarî keno. Fransa zî her tim tundîya polîsan est o, çalakîyan de tundîya ma kenê la ma Kurdistan de dî ke çiqas Ewropa ra cîya yê. Wesayîtê ma her tim ameynî vindertiş, ma zaf bi zehmetî resayî ewta, zêde kontrol estbî. Sey embazê enternasyonalîst ma pêrabesteyê Ewropa ra cîya dîyî. Seba mi zaf weş bî ke, şar wayîrê hêzî yo.”
Flora Vitoux da zanayîş ke beşdarî xebatanê kampanyaya “Ji Abdullah Ocalan re azadî ji Pirsgirêka Kurd re Çareseriya Demokratîk” ke Citmenga 2023î de zaf welatan ame destpêkerdiş zî bîya û wina dewam kerd: “Ez Ewropa de beşdarî meşê seba azadîya Serekî ameyî viraştiş, bîya. Vengdayîşê Rayberê Şarê Kurd Abdullah Ocalan, sey persfektîfêk o. Ma qal kenê ke seyî ra 25î ciwanî mîyanê depresyonî de yê, bi raştî zî persfektîfê herekete û Serek Apo eşkeno rayîrêkî nîşan ciwanan bido. Ma nika pêvajoya cîya nîqaş kenê.”
‘Zafêr xo bi rêxistin bikerê’
Flora Vitoux destnîşan kerd ke seba azadîya fizîkî ya Rayberê Şarê Kurd Abdullah Ocalan wa têkoşînêk bêro dayene û wina şîrove kerd: “Sey ke vizêr Serekî mesajê xo yê seba ciwanan de zî ard ziwan no problemêkî derheqê xo bi rêxistinkerde yo. Her demî ra zafêr verpirsîyarî keweno ser milê ma, wa ma zafêr xo bi rêxistin bikerê. Wa ciwanî bi hêzê xo bawer bibê, seba ke ma hêzê xo çiqas xurt bikerê, her kes bivejo kolanan ti kes nêeşkeno vere ma bigêro. Ewta de têkoşînêko verba helînayîşî est o, kampanyayê seba azadîya fizîkî ya Serekî yenê averberdiş est ê. Ez do bi tecrubeya xo ya ewta, zafêr bixebita. Wa ma na paradigma verba faşîzmî bikar bîyarê.”
