Fehmî Korkmaz ke birayê Mahsum Korkmazî yo ke kadroyê sereke yê PKK’yî ra yo, dîyar kerd ke badê vengdayîşê Abdullah Ocalanî ganî dewlete gamanê xo biêrza û va: “Ma azadîya, ciwîyayişo azad û demokratîkî ser o îsrar kenê, ma aştîyêka birûmete wazenê.”
Vengdayîşê “Aştî û Komelê Demokratîkî” ke Rayberê Şarê Kurdî Abdullah Ocalanî 27ê Sibate de kerdo, rojeve de cayo tewr muhîm de yo. Na babete de keyeyê ke têkoşînê azadîya kurdan de berdelê girdî dayî, ê zî vengdayîşî rê wayîrîye kenê û dewlete ra vanê ganî gamanê xo biêrzo. 15ê Tebaxe 1984î de qeza Dihê (Eruh) ke Sêrt de, keyeyê Mahsum Korkmaz (Egîd) ke kadroyê sereke yê PKK’yî ra yo, dîyar kerd ke ganî prosesî rê bi cîddîyet nêzdî bibê.
Keyeyo ke berdelê aştîye dayo
Fehmî Korkmaz birayê Korkmazî va ke birayê ey tena şarê kurdî rê nê, keyeyê xo rê zî rayberîye kerda. Korkmazî wina va: “Waya mi Meryem Korkmaz Hozan Mizgîn reyde Êlih de xebatê sîyasî kerdêne ke êlula 1980î de marûzê hêrîşî menda. Karê fedaî de emrê xo da. Weysel Korkmaz (Egîdê Biçûk) zî serra 1991î de beşdarê PKK’yî bî. 3ê hezîrana 1995î de Koyê Helqîsî yê Qebilcewzî (Sason) de 28 embazanê xo reyde şehîd bî. Pîyê mi Şehmuz Korkmaz zî 1985î de Qumandanîya Jandarmaya Sêrtî de işkenceyê 50 rojan ra dima cuya xo vîndî kerde. Ma qet gamêk apey nêeşte, ruhê Egîdî mi rê zî rayberîye kerde.”
‘Ma aştîyêka birûmete wazenê’
Korkmazî derheqê vengdayîşê “Aştî û Komelo Demokratîkî” de ke Rayberê Şarê Kurdî Abdullah Ocalanî 27ê sibate de kerdbî, wina vat: “Tîya de problemêk est o ke seserrî ra vêşêr o. Ronayîşê Cumhurîyetî ra nata yeno waştene ke kurd bi înkar û îmha bêrê vindîkerdene. Nê prosesî de şarê kurdî sesserrî yo ke xover dano. Şaro ke vera nê heme hêrîşan xover dayo, do bibo rayberê nê prosesî. Şar erdê xo ser o ciwîyayîşê demokratîk û azadî de israr keno. Seba nê ma aştîyêka birûmete wazenê. Ganî dewlete rolê xo û mîsyonê xo aştîya birumete rê bîyaro ca, prosesî rê bi cîddîyet nêzdî bo.”
