Wekîlê DEM Partî Omer Ocalanî: Serekî nê vatî; sosyalîst yeno manaya komelkî, komelkî yena manaya şarî reyde xebitîyayîş. Ez şîya kamca, mi uca de xo rêxistin kerd.
Wekîlê DEM Partî Omer Ocalanî qalê pêvînayîşê bi Rayberê Şarê Kurdî Abdullah Ocalanî Yeni Ozgur Politika rê kerd.
Omer Ocalanî vat: “Zîyaretê keyeyî 31ê adare de ame kerdene, roja diyîne ya roşanî bîye. Babîyê mi (Mehmet Ocalan) wexto ke qalê vîrameyîşêkê 50 serrî verî kerdêne Serekî zî qalê ci kerd. Babîyê mi vîrameyîşê seranê 77-78î kerdêne û vatêne ‘Ti û Cemîl Bayik şima ameybî keyeyî. Dadîya mi werd pewtibi. Babîyê mi ame û vat ke şima heta nika têkoşînê komunîzm û sosyalîzmî kerdêne la dewaya kurdayetîye û Kurdîstanî hîna giran a. O çax Serekî vat ke no hedîse yeno vîrê ey zî. Serekî vat ke ‘babîyê mi vatibi Şêx Seîdî zî na dewa kerdêne la zaf bedelî zî dayî. Dormeyê ey zaf bi, dormeyê şima de kes çin o, şima na da dewa de zehmetîye ancenê.
Birêz Ocalan 76 serrî yo. Emrê ey bi xoverdayîş û têkoşînî derbaz bi. Têgêrayîşo ke bi 6 kesan dest pêkerdibi ewro resayo mîlyonan kesan. Xora vengdayîşê 27ê sibate de no ame dîyene.”
Omer Ocalanî îfade kerd ke reya diyîne ya ke ey Rayber Ocalan dîyo û vat: “Apêkî ra zêdeyêr Birêz Ocalan mi rê lîderêkê têgêrayîşî û serekêk o.”
Omer Ocalanî da zanayene ke Rayber Apo çarçewa îmkananê xo de ge ge kanalanê tirkan seyr keno. Omer Ocalanî vat: “Pêvînayîşê ma saetêke û nêm dewam kerd. No yew pêvînayîşê keyeyî bi. Goreyê huqûqî ganî keyeyî tim bieşkê merdimanê xo yê tepişteyan bivînê.”
Omer Ocalanî qalê ercnayîşanê Rayberê Şarê Kurdî yê sîyasîyan wina kerd: “Paradîgmaya Birêz Ocalanî wayîrê perspektîfêkê hîrayî yo. Rojhelatê Mîyanênî û Tirkîya de cîyakerîye ser o polîtîkayî est ê. Birêz Ocalan nê nêzdîbîyayîşî qebul nêkeno. O paradîgmayêka winayêne dano werte ke tede armenî, tirkî, kurdî ûsn pîya ciwîyenê.”
Omer Ocalanî pare kerd ke Rayberê Şarê Kurdî Abdullah Ocalanî pêvînayîş de embazê xo yê domanîye û dewê nêzdîyî pers kerdî û silamê taybetî erşawitî. Omer Ocalanî vat: “Birêz Ocalan zaf girîngîye dano manewîyatî. Ey embazê xo yê domanîye û dewê sey Cibin, Sariçîçek, Kumbaglar, Atmacayan, Erahî pers kerdî, embazanê xo yê domanîye rê selamê xo şawit.”
Omer Ocalanî pare kerd ke Rayber Ocalanî sîyasetê demokratîkî rê mesajê taybetî şawitî: “Serek rojdemî ser o hakîm o. Ganî mekanîzmaya dewlete hinî bi cidîyetî nêzdîyê nê prosesî biba. Xeripnayîş, texrîbkerdiş rehet o la awankerdiş zehmet o. Serekî nê vatî; ‘sosyalîst yeno manaya komelkî, komelkî yena manaya şarî reyde xebitîyayîş.’ No rayîr zehmet o, derg o la ma do pîya komelê demokratîkî awan bikerê. Heta hêzê xo ma do destek bidê prosesî.”
Omer Ocalanî îfade kerd ke Rayberê Şarê Kurdî Abdullah Ocalanî cewab dayo şikanê şarî zî û vat: “Ma Serekî ra vat ke şar prosesê 2015î ra semed şikdar o. Serekî zî vat ‘Şar heqdar o, hol fikirîyeno. Rewşe wina ya la ez hêvîya xo pawena. Seba pawitişê nê prosesî destê mi ra çi bêro ez do bikera.” Ocalanî vat ke “Ez şîya kamca mi xo rêxistin kerd. Domanîya xo ra nata ez xo rêxistin kena. Ez zaf girîngîye dana rêxistinîye.’”
