Meclîsê Ekolojî yê Amedî ra Mehdî Aslan seba talankerdişê xoza ser balê ante serê prosesê mabênê kurdan û dewleta Tirkîya û vat: “Vindertişê şerê çekan ra nat hêrişê serê xoza zî zêde bîyê Badê nê prosesî şîrketan hîna zêde dest bi talankerdişê xoza kerd.”
Vakurê Kurdîstanî de xoza ser o şerêko taybetî yeno rayraberdene. Taybetî şaristan û qezayanê Amedî de xebata talankerdişê xoza bê mabên dewam kena. Tewr zêde dewê kê verê cû ameyê vêşayîş û vengkerdişî xebata gêrayîşê petrolî, medenî, zerd, HES û GES’an yenê kerdene. Vera talankerdişê xoza de sazgehê ekolojî û şar, têkoşîn dano. Talankerdişê xoza ser Meclîsê Ekolojî yê Amedî ra Mehdî Aslanî ajansê ma rê (AW) qisey kerd.
‘Zafê qezayan de talankerdişê xoza est o’
Mehdî Aslan dîyar kerd ke dorûverê Amedî de qezayan ra bigîro heta dewan, her ca dê talankerdişê xoza zaf zêde est ê û wina vat: “Qezaya Pasûr ra bigîrê heta Çêrmûge, Erxenî, Licê, Xana Axpar, Pîran û zafê cayan de talankerdişê xoza yenê kerdene. Ma sey Meclîsê Ekolojî vera talankerdişê xoza têkoşînêk gird da destpêkerdene. Taybetî Erxenî dê wexto ke nêzdî de Cengîz Holdîng dest bi talankerdişê xoza kerd. Amed de zi Fîskaya ra bigîrê heta Pirdo Des Çime ameyo îşxal kerdene. Çayxanê û meyxanêyî viraştê. Gedetî ya mi nê cayen de vîyarte. Verê cû ne tewir çîyêk çin bî. Ma baxçeyan dê zerzewat ramitêne. Zerzewatê Amedî nê baxçeyan ra ameyne. Wexto ke şaredarî destê qeyumî de bî her ca ame îşxal kerdene.”
‘Ma vera talankerdişê xoza têkoşîn danê’
Mehdî Aslan qiseyê xo de Balê ante serê prosesê mabênê kurdan û dewleta Tirkîya ke şerê cêkan vindertnayene ra dima hêrişê serê xoza zî zêde bîyê û vat: “Badê nê prosesî şîrketan dest bi talankerdişê xoza kerd. Ma vînenê ke, şîrketî pê makîneyanê xo ameyê serê koyan de xebitîyene, sekenê? Gêrenê maden û petrol.
Ma vanê, wayîre xozaya xo vejîyê, la dewlete hetkarîya înan kena ma ser de yena. Deştan de petrol, koyan de zerd, paxir û maden gêrenê. La ma do vera nê talanî têkoşînê ma dewam bikero. Ganî nê şîrketî bi hawayêko rehet nêeşke bixebitîyê. Badê ke şer ameyo vindarnayene koyan de meydan şîrketan rê mendo. Şer ame vindertene la şerê ekolojî dest pêkerd. Ma sey Meclîsê Ekolojî dewan de gêrenê, şarî reyde yenê têhet û vera talanê xoza têkoşîn danê. Wa her kes naye baş bizano ke şarê Amedî talanê xoza qebûl nêkeno.”
‘Talankerdişê xoza ma qêbul nêkenê’
Medî Aslan seba talankerdişê xoza vengdayîşê dewlete kerd û vat: “Koyê ma cayê cuya ma yê, wexto ke şima xoza talan bikerê ma naye qebûl nêkenê. ma wazenê dewlete goreyê prosesî têbigêro û wayîr ro xoza vejîyo. La dewlete hetê şîrketan kena û gureyê xo bi ca nêana. Ganî vêrê cû xoza reyde aştî bikerê, xoza xeta ma ya sûr a. Seba vera talankerdişê xoza şarê ma eşkeno muracatê ma bikero, eke şarê Amedî hişyar bo û biwazo kes nêeşkeno xoza talan bikero.”
