Wexto ke wisar ame Karêrê Çewligî de dewa Cafranî de Çirê Vîyalêre keno gime gime û pê rindekîya xo mordeman heyran verdano.
Wexto ke beno wisar xoza kincanê zimistanî erzena û kincanê newîyan dana xo ra. Wextê gimnayîşê awanê dereyan û çiran o. Game bi game rindekîya Kurdistanî nêna salixan. Herêma Karêrî ya ke girêdayeyê Çewligî ya zî bi rindekîya xo namdar a.
Dewa Cafran hetê rindekîye de cayê xo cîya yo. Bi koyanê xo yê berzan, dereyanê xo yê xorînan û çetinan, zinar û hişkêranê xo, dar û beranê xo, zafêrî zî biranê xo yê delalan yena naskerdene. Wexto ke bî wisarî êdî beno zinga zinga dereyan û çiran. Wext wextê çiran o. No wext de dewa Cafranî rindekîya xo kena di qatî. Çike Çirê Vîyalêre û çirê bînî vengê xo kenê berz. Tena vengê xo berz nêkenê, reng û şîpê xo yê delalî zî nîşan danê.
Çirê Vîyalêre mabênê mezra Gole û dewa Cafranî de serê rayîrê erebeyan der o. Dewa Cafranî şaristanê Çewligî ra qasê 50 dk durî ya. Berzîya Çirê Vîyalêre qet nêbo 40 metre est a.
