ÎHR’yî dîyar kerd ke Îran de 5 girewteyî ameyê dardekerdene
Rêxistina Heqanê Merdiman a Îranî (ÎHR) ke merkezê ci Norweç de yo dîyar kerd ke ewro Hepisxaneyê Vakîlaband ê şaristanê Meşhed ê Îranî de 5 girewteyî bêyê ke haya keyeyanê înan biba û zîyareto peyên bêro kerdene, ameyê dardekerdene.
Dîrektorê ÎHR’yî Mahmood Amîry Moghaddam 5 kesê ke ameyê dardekerdene sey ‘Girewteyê sîyasî’ pênase kerde û vat: “Nê girewteyan rê îşkence ameyo kerdene. Bi hewayêko adil nêaameyê muhakemekerdene û cezaya kiştişî dîyaya înan.”
Goreyê eşkerayî nê kesan ra 4 kesî endamê cematêko Misilman ê Sunnî bîyê ke Komara Îslamî ya Îranî de kêm ê. Ame dîyarkerdene ke keso bîn zî mezhebe Şîî ra bîyo.
Îran dinya de Çîn ra pey welato sereke yo ke cezaya dardekerdişî tewr zaf kena. Goreyê ÎHR’yî destpêkê serre ra heta nika tewr kêm 245 kesî ameyê dardekerdene. ÎHR’yî dîyar kerd ke hûmara înfazan bi rengêko bi guman zaf bîya.
