Şaxê ÎHDî yê Amedî û merdime vîndîbîyayan hewteyê 844. de verê Abdîdeya Heqê Cuya ya Parka Koşuyoluyî ya qezaya Rezanî de kom bîyê û çalakîya “Wa vîndîbîyayan bêrê dîyayîş û qetil bêrê dariznayîş” viraşt.
Merdime vîndîbîyayan û Şaxê ÎHD’î yê Amedî bi wesîleya vîndîbîyayan bêrê dîyayîş û qetil bêrê dariznayîş Parka Koşuyoluyî de kom bîyê û verê Abîdeya Heqê Cuya de çalakîya xo ra dewam kerdê. Çalakîya nê hewteyî de akubetê Alî Îhsan Dagliyî yê ke 14ê Nîsana 1995î de Farqîn de demê destbendkerdene de ame vîndîkerdiş persayê.
Hemserekê Şaxê ÎHD’î yê Amedî Ercan Yilmaz beyanat da û dîyar kerd ke nêzdî hewt aşman ê ke nîqaşê çareserkerdişê probleme kurd bi rayîrê diyalog û muzakere yenê kerdêne û wina va: “Na hêvî dana ma, seba çareserkerdişê problemi yê destpêkî hewcedarî bi demo vîyarte rîbirîmendişî est o. Ganî dewlete komîsyonê adalet û bi demê vîyarteyî ra rîbirîmendişî awan bika.”
Keye ra hêriş ame kerdêne
Avûkat Berfîn Elçî, esteneka Alî Îhsan Dagli wend. Berfîn Elçî dîyar kerd ke Dagli 14ê Nîsana 1995î de yeno destbendkerdiş û dima zî yeno vîndîkerdiş û wina va: “Goreyê xebara rojnameyê Evrenselî yê 11ê Citmenga 1997î de keye seba ke serî ÎHD’î ra dano hêzê dewlete ser dewa înan erzenê û verba keyeyî tundî bikar anenê. Hewna eynî xebare de wêneya Alî Îhsan Dagliyî ya ke demê destbendkerdişî de bîyo yeno parekerdiş û bi na awayî destbendkerdişê Dagliyî yeno belgekerdiş. Wêne de dîyeno ke destê Alî Îhsan Dagli kelepçekerdeyî yo. Keye 16ê Citmenga 1997î de bi na wêne serî şaxê ÎHD’î yê Amedî dano.”
Wa qetil bêrê dariznayîş
Berfîn Elçî destnîşan kerd ke keyeyî serî heme mekanîzmayê huquqî ra dano la ti netîce nêgêno û wina qedîna: “Keye doz berdo Heqê Merdiman ê Ewropa (AÎHM) û AÎHM’î zî Tirkîya mehkum kerda. Wa akubetê vîndîbîyayan bêro aşkerakerdêne û qetil bêrê dariznayîş.”
