Hemşaredarê Şaristanê Girdî yê Amedî Serra Bucak û Dogan Hatunî, xizmetê ke yew serre de bajar de xizmetanê sosyalan ra projeyê binawanî, çalakîyê kulturî ra xebatê ciwanan de zaf qadan de kerdê û gamê ke eştê, aşkera kerdî.
Hemşaredarê Şaristanê Girdî yê Amedî Serra Bucak û Dogan Hatunî, seba ke yew serrê ke wezîfe girewtişî ra dima vîyarto analîz bikê û projeyê serra 2025î bidê şinasnayîş, qezaya Sûrî de cayêk de kombîyayîşê çapemenî organîze kerd. Zaf rojnamegerî beşdarê kombîyayîşê çapemenî bîy.
‘Ma yew serre de bê ke tawîz bidê xebatê xo dewam kerdî’
Hemşaredare Bucak, ke qiseykerdiş xo bi silamdayîşê beşdaran dest pêkerd, va: “Raşt o, seba ma pêrune, seba Amedî serrêka tarîxî bîye; çunke her di aşman de yew rey bi endîşeyê ‘gelo qeyûm yeno?’ yan zî bi rojevêk ke prosesê sîyasî do senî tesîr biko Amedî ser, ma yew serre vîyarna û na yew serre de ma bê ke qet tawîz bidê xebatanê xo, rayîrê xo de dewam kerd. Bi no hewa, bi şarê bajarî, bi mêmananê bajarî, bi dîyasporayê ke hesretîya Amedî ancenê û bi her kesê ke çar hetanê dinya ra Amedî ra hes kenê, goreyê ma ma serrêka muhîme vîyarnaye.”
‘Amedî kulturê pîya ciwîyayîşî rê wayîrîye kerde’
Hemşaredare Bucak, ke bale ante ser ke yew serre de bi endamanê meclîsê weçînayeyan, bi muxtaran, bi cinîyan û bi dînamîkanê sîvîlan yê bajarî pîya ameyê têhet, beşdarîye dewam kerda, seba ke vengê her qismê komelî, vatişê înan, îhtîyacê înan û pêşnîyazê înan bêrê cewabdayîş projeyî kerdê, qiseykerdişê xo wina dewam kerd: “Ez xo deyndar vînena ke amedijan rê teşekur bikera ke na yew serre de piştî da ma. Amedî zaf rind wayîrîye kerde. Wayîrîye kerde demokrasî, aştî û kulturê pîya ciwîyayîşî; şaredarîya xo rê ke kîşta xo de ya, cayê xo de rexne zî kerd. Pêro nê çî bi hawayêko ke Amedî yeno, bi hawayêko eyînî û awankerdox bîy. Ez xo deyndar vînena ke seba na piştî teşekur bikera şarê Amedî rê, komelê sîvîlî, her kesê ke ma tena nêverdayî û şima xebatkarê çapemenî yê erjayeyî. Weş o ke ma pêro pîya Amed ê. Ez wazena zaf teşekur bikera her kesê ke na yew serre de qet ma tena nêverdayî û ma kerd hîs bikê ke ma pîya çîyêko rast kenê.”
‘Ma demoralîze nêbîyî, ma zanayêne ke ma se kenê’
Hemşaredar Hatunî zî va ke bi fehmê xizmetê şarî û bajarî ameyê wezîfe ser û xebatê xo bi na hişmendî dewam kerdê. Hemşaredar Hatunî ke va “Ganî ma seba awe, rayîr, herre, tarîx, kultur û seypêyîya xo xebate dewam bikê”, wina dewam kerd: “Ma va ma do rojêk zî bibo ma xebate dewam bikê û coka ma demolarîze nêbîyî. Çunke ma zanayêne ke ma se kenê, şarê ma piştî dayêne ma û na piştî hêzêk dekerd zerrîya ma. No hêz zî ma bêhêvî nêverdayêne. Seba ney ma teşekur kenê heme embazanê xo û şarê xo rê.”
Badê qiseykerdişan, Hemşaredaran, fealîyetê Serekîyanê daîreyanê ke şaredarî de est ê û xebatê înan ê yew serrî rêz bi rêz aşkera kerdî.
Hemşaredare Bucak: Ma deynê xo kêmî kerd
Hemşaredare Bucak ke va goreyê qeydanê muhasebe û butçe (Tabloyê Malî) yê 31 Kanûne 2023î, deynê şaredarî yê kilmwade û dergwade pêro 3 mîlyar 73 mîlyon 996 hezar 173 TL qeyd bîyo, îfade kerd ke seba ke rewşa xirabe ya malî wedarê, goreyê bîlançoyê 28 Adare 2025î, înan deynê xo ardo 1 mîlyar 883 mîlyon 206 hezar 763 TL.
Serekîya Daîreya Xizmetanê Cinî û Keyeyî
Hemşaredare Bucak, qiseykerdiş xo bi dayîşê malumatanê xebatanê Serekîya Daîreya Xizmetanê Cinî û Keyeyî dest pêkerd. Aye va ke 6 Merkezanê Ciwîyayîşê Cinîyan de 10 şaxanê cîya-cîyayan de (tekstîl, spor, kursê Quranî, asnawe ûsn.) 63 kursê meslekan abîyê û 2 hezar 500 cinîyan îstîfade kerdo, va ke çarçewaya butçekerdişê ke hîsdarê zayendîya komelkî yo de, bi hemkarîya şaredarî û rêxistinanê komelê sîvîlî 63 xebatê perwerdeyî bîyê.
Xoresnayîşê cinîyan ê 47 hezarî ra vêşêr
Hemşaredare Bucak ke qeyd kerd ke semtê Ben û Senî de ke sey herêma pîlotî weçînîyaya, tede xebatêka hîra ya saha xerîtaya feqîrîya cinîyan viraşta û datayê xerîtaya feqîrîya cinîyan dekewtê sîstemê malumatê bajarî, xebatê ke na qada de bîyê, wina rêz kerdî:
“Çarçewaya xebatanê hîşyarîye de resîya 8 hezar cinîyan. Seba ke cuya înan a rojane rehet bibo, 7 hezar cinîyanê ke garantîya înan ya sosyale çin a, JINKARTa bêpere ame dayene. Bi protokolê ke bi Serekîya Baroya Amedî virazîyayo, piştî û şêwirmendîya huqûqî dîyena cinîyanê ke mexdûrê şîdetî yê. Seba ke problemê ke cinî seba nêseypêyîya zayendîya komelkî ciwîyenê tesbît bikê û projeyê averşîyî ke nê problemî çareser bikê, Merkezê Cigêrayîş û Tetbîqkerdişê Problemanê Cinîyanê Amedî (DİKASUM) 8 serran ra dima reyna dest bi xebate kerd. Çarçewaya ‘Projeyê Adettendir Üretiyoruz’î de ke vera feqîrîya reglî de yo, ma semtê Ben û Senî de atolyeya pedê şuşteyî akerd. Atolyeyanê ma ra heta nika 166 cinîyan îstîfade kerdo. Unîversîteya Dîcle de Keyeyê Cilan reyna aktîf bî û xizmetê şutişê cilan û ziwakerdişî yo bêpere dayîyayeno wendekaran. 8 hezar 10 cinîyan merkezanê ciwîyayîşî û keyeyanê stargehî ra îstîfade kerd. Çarçewaya çalakî, perwerde, asayîş û xebatanê hîşyarîye ke Serekîya Daîreya Cinîyan serra de organîze kerdî, resa 47 hezar 125 cinîyan.”
Serekîya Daîreya Xizmetanê Astengdar û Pîran
Hemşaredar Hatunî va ke 580 şarê ma ra ke emrê înan zêde bîyo, 160ê înan ke tena ciwîyenê, pêro 290 kesan rê keyeyan de xizmetê muqatbîyayîşî dîyayo, va ke aşma Ramazanî de 580 keyeyî zîyaret bîyê û 200 paketê werdî vila bîyê. Hatunî ke va 176 kesanê astengdaran rê keyeyan de xizmetê weşîye û muqatbîyayîşê şexsî dîyayo, wina dewam kerd: “Pêro pîya 485 kesan rê sandalîya tekerlekine ya akuyine û manuelle, 685 kesan rê piştîya malzemeyê medîkalî, 600 kesan rê xizmetê tamîr û muqatbîyayîşê ekîpmanan ameyo dayene. Seba kesanê ke çimê înan nêvînenê, perwerdeyê ‘Tetbîqê Hereketê Serbest’î dest pêkerd û 200 gopala sipîye vila bîye. 45 wendekaranê Merkezê Otîzmî rê 5 rojê hefteyî perwerdeyê sporî ame dayîş. Seba ke xizmet bido mabênê keye û nêweşxane seba nêweşanê kansêrî ke hûmara înan resena 20 hezarî, Projeyê Taksîya Sosyale dest pêkerd û heta nika 71 kesan îstîfade kerdo na proje ra û pêro pîya 710 servîsê nêweşxaneyî temîn bîyo. 3 hezar 52 kesanê astengdaryan rê xizmetê servîsê bêpere ame dayîş. Studyoyê qeydê vengî, 8 serran ra dima reyna tamîr bî û ‘Projeyê Kitabxaneyê Vengî’ ke kesê ke çimê înan nêvînenê tira îstîfade kenê. Programanê perwerde û hobî ke Merkezê Ciwîyayîşê Aktîfî de organîze bîyê, tede 981 kesanê astengdaran rê xizmet ame dayîş. Programanê xizmetê sosyalî ra zî 1 hezar 600 kesan îstîfade kerd. Bi şêwirmendîya ke seba nêweşanê çolyakî dîyena, 1 hezar 210 kesan rê piştîya werdê bêgluten ame dayîş. Perspektîfê Serekîya Daîreya Astengdaran seba qadanê bînan rayîr akeno.”
Serekîya Daîreya Xizmetanê Sosyalan
Hemşaredare Bucak ke va Kreş û Keyeyanê Muqatbîyayîşê Rojane yê Zarokistanî ke xizmetê zafziwanî danê de pêro pîya 360 gedeyî perwerde gênê, çarçewaya Karta Piştîya Sosyale de serra 2024 de 23 hezar 935 keyeyan rê 23 mîlyon 935 hezar TL, aşma Adare yê serra 2025î de zî 3 hezar keyeyan rê 9 mîlyon TL, pêro 32 mîlyon 935 hezar TL dayîyayo, va ke 5 hezar 260 wendekaranê ke reya verêne unîversîte qeyd bîyê rê pêro 78 mîlyon 900 hezar TL piştîya perwerdeyî ya bêbedel ame dayîş.
Hemşaredare Bucak ke va serra 2024 de 11, serra 2025 de 9, pêro pîya 20 keyeyanê ke muhtacê ardimî yê rê pêro 420 hezar TL ardimê neqdî bîyo, va ke aşma Ramazanî de 4 merkezanê cîya-cîyayan de 188 hezar 500 kesan rê werdê fitarî ame dayîş, Bankaya Cilan de îhtîyacê 2 hezar 423 cilan yê 1 hezar 124 kesan temîn bîyo û seba cinîyanê ke Amedî de ciwîyenê û newe gedeyan anê dinya 3 hezar hebî “Paketê Piştîya Gedeyê Neweyî” hazir bîyo.
Hemşaredare Bucak ke va çeşmeyê îkramî ke 6 cayanê cîya-cîyayanê bajarî de ronîyayo, tira 190 hezar kesan rê şorba û lîmonata îkram bîya, va ke 17 qezayan de 955 paketê werdî vila bîyê keyeyanê ke muhtacê ardimî yê, keyeyanê dezavantajinan rê bi piştîya psîkolojîke xizmetê sosyalî, perwerde û şêwirmendî ame dayîş. Hemşaredare Bucak va ke Merkezanê Musayîşê Heyat Boyu de 19 branşan ra roje de 165 kesan rê perwerdeyê meslekan ame dayîş.
Serekîya Daîreya Xizmetanê Weşîye
Hemşaredar Hatunî ke qeyd kerd ke 17 qezayan û 1 hezar 46 merkezan de xebatê dermanî bîyo, va ke Keyeyê Muqatbîyayîşê Heywanan de 400ê înan kutik, 150yê înan pisîng, pêro pîya 550 heywanan rê xizmetê muqatbîyayîş û werdî ame dayîş û 6 hezar 830 heywanan rê xizmetê tedawî û rehabîlîtasyonî ame dayîş. Hemşaredar Hatunî ke va derheqê cayê ciwîyayîşê heywanan de gamêka muhîme eşta, va ke xebatê cayê ciwîyayîşê tebîî dest pêkerdo û xezîne ra 284 donimî erd tahsîs bîyo. Hemşaredar Hatunî va: “Badê ney do cayêk bibo ke gandarê kuçeyan eşkenê tebîet de ciwîyayîşê xo dewam bikê.”
Hemşaredar Hatunî ke va muayeneyanê ke Merkezê Weşîye de ke bi hemkarîya Şaredarîya Baglar dest pêkerdo, tede 4 hezar 950 kesan xizmetê weşîye yê bêpereyî ra îstîfade kerdo, wina qisey kerd: “Bajar de 3 hezar 806 xizmetê defnî û nînan ra teber bajar û qezayan de pêro 9 hezar 47 xizmetê neqlê cenaze ame dayîş. Reyna qezaya Sûrî de Taxa Bagivarî de 588 hezar metrekare de dest bi viraştişê cayê mezelî yê neweyî bîyo.”
Serekîya Daîreya Kultur û Karê Sosyalan
Hemşaredare Bucak ke va bi beşdarîya kayê neteweyî û mîyanneteweyî 9. Festîvalê Tîyatroyê Amedî û seba gedeyan û ciwanan zî tîyatro û festîvalî virazîyayê, va ke pêro nawitişanê tîyatroyî de 25 hezar 260 hunerhesî beşdar bîyî. Aye qeyd kerd ke çarçewaya Festîvalê Filmê Kilmî yê Mîyanneteweyî yê Çîftlîkê Veganî de 10 filmî nawîyayê, seba gedeyan û pîlan 3 aşman bêpere “Rojê Filmê Sinebir” organîze bîyo, nawitişê sînema 14 hezar 290 sînemahesan rê ameyê temaşekerdene.
Hemşaredare Bucak ke va seba gede û pîlan aşmanê hamnanî de Merkezê Kulturî yê Çand Amedî de 17 şaxan de (muzîk, drama, resim) kursê hunerî abîyê, va ke Keyeyê Dengbêjan (Mala Dengbêjan) 95 hezar 300 kesan zîyaret kerdo.
Serekîya Daîreya Pawitişê Dorûverî û Kontrolî
Hemşaredar Hatunî va ke çarçewaya kampanyaya “Ez Amedî ra hes kena, leymin nêkena” de xebatê seferberîya pakîye dest pêkerd. Hemşaredar Hatunî ke va roje de 1 hezar 400 ton eşte beno Tesîsê Eşteyê huşkî yê Entegre û aşme de 4.6 MW enerjî dest keweno, wina dewam kerd: “Serra peyêne de 67 mîlyon 466 hezar TL ameye dest kewt. Arterê serekeyî û parkan de 1 hezar 400 hebî qutîyê çopî yê galvanîzî montaj bîyê. Kuçeyanê bajarî de 4 hezar qutîyê çopî montaj bîyê. Elektrîkê ke Santralê Enerjîya Rojî yê Sumerparkî ra virazîyayo 254 hezar 883 KW ra 1 mîlyon 299 hezar 500 TL ameye qeyd bîyo. Santralê Enerjîya Rojî yê Otogarî ra 356 hezar 400 KW elektrîk virazîyayo û 1 mîlyon 805 hezar ameye dest kewto. Keyeyê Rojî de seba wendekaranê verên, orte, lîse û unîversîte perwerdeyê enerjîya newebîyaya, vurnayîşê îklîmî û eşteyê sifirî ame dayîş.”
Serekîya Daîreya Vurnayîşê Îklîmî û Eşteyê Sifirî
Hemşaredare Bucak ke va sey gamê verênî yê cîyakerdişî çimeyî de, zereyê dezgeyî de qutîyê reyna xebitnayîşî ronîyayê, qiseykerdişê xo wina dewam kerd: “Bajarî de dest bi arêkerdişê rûnê eşteyî bîyo û 3 aşman de 20 ton rûnê eşteyê nebatî arê bîyo û îmha bîyo. Xebatê Wendegehê Îklîmê Agroekolojî qedîyenê û tîya de bi kitabxaneyê toximan ke ronîyayo, arşîvkerdişê toximanê herême temîn bîyo. Wendegeh seba zîyaretkaran akerde yo û tîya de perwerdeyo ke amancê înan hîşyarîya vurnayîşê îklîmî û ekolojîk o, dîyeno. Bajar de bi kes û dezgehan ke bi citkarîya aktîfe meşxul benê, kombîyayîşêko hîra organîze bîyo û do seba ziraet û heywandarîye rota bêro tesbîtkerdene.”
Serekîya Daîreya Park û Baxçeyan
Hemşaredar Hatunî ke va 2 mîlyon 780 hezar vilê demserrî ke serayan de yenê ramitene, va ke 8 hezar 360 darî ronîyayî, 30 hezar 270 şitilî resayê herre, 15 hezar toximê çamî ke gozikanê çamî ra dest kewtê ronîyayê û qadan de ke şitilî tede yenê resnayene, 17 hezar gulî virazîyayê. Hatunî ke va bajar de 72 hezar darî û lemî ameyê tarşnayene, va ke goreyê îhtîyacan park û baxçeyan de kêmanîyê sey ekîpmanê kayî, qutîyê çopî, masaya pîknîkî temam bîyê û çarçewaya nê xebatan de 32 parkan de, 3 mîlyon 925 hezar metrekare de tamîr bîyo.
Serekîya Daîreya Xizmetanê Dewan
Hemşaredare Bucak ke va pêro 80 hezar 880 metre kanalê awedayîşî yê girewteyî û akerdeyî virazîyayê, va ke na xebate ra 5 hezar 67 citkaran îstîfade kerdo û 18 hezar 635 dekar erdê ziraetî resayo awe. Bucak ke va 3 projeyê cîya-cîyayan rê pêro 75 mîlyon 940 hezar TL sermîyane ronîyayo, va ke tamîrê 14 hebî golê awa şimitişê heywanan bîyo, na xebate de 66 hezar 200 heywanê 4 hezar 720 heywandaran û 5 hezar 110 dekar qada ziraetî resaya awe.
Serekîya Daîreya Resî
Hemşaredar Hatunî ke va bi projeyê dingê biaqilî, malumatê pêroyê resî dest pêkerdo ke deqe bi deqe raywanan rê bêro parekerdene, Merkezê Kontrolê Trafîkî ronîyayo û hereketkerdişê trafîkî kontrol bîyo, va ke 200 hebî Sîstemê Malumatdayîşê Raywanan û Îlanê Astengdaran ê Zereyê Otobusî ronîyayo. Hemşaredar Hatunî ke va çarçewaya protokolê ke bi otobusanê şarî virazîyayo de problemê 30 serran yê transportê raywanan ê bêpere bi hawayêko pêroyî çareser bîyê, wina qisey kerd: “Sey çareserîya kilmwade seba problemê resî ke serran ra nata çareser nêbîyo, destpêkî de 14 hebî, serre de pêro 49 otobusê raywanan herînîyayê. Hedefê ma bi 80 wasiteyan transportê pêroyî yê zereyê bajarî rehetkerdiş o.”
Serekîya Daîreya Koordinasyonê Ciewnîyayîşê Rayîrî û Binawanî
Hemşaredare Bucak ke va rayîranê taxanê dewan ê 17 qezayan de pêro pîya 577 kîlometre xebatê rayîrê asfaltî kerdo, va ke qezayanê merkezî de 20 kîlometre rayîrê îmarî yê duble yê çar û şeş xetan dekerdê xizmet, merkezê bajarî de 160 hezar ton, rayîranê taxanê 17 qezayan de 50 hezar ton, pêro pîya 210 hezar ton asfaltê betonî rokerd. Hemşaredare Bucak va ke 285 hezar metrekare xebatê peyarayîr û parke zî bîyo.
Serekîya Daîreya Zabita
Hemşaredar Hatunî ke va seba resêko rehet û însanî, mînîbusanê zereyê bajarî de 22 hezar 500, otobusanê şarî yê xususî de 19 hezar 300, taksîyanê tîcarîyan de 28 hezar 800, servîsan de 1 hezar 750, mînîbusanê qezayan de 15 hezar 200, otobusanê mabênê bajaran de 8 hezar 300 wasiteyan de kontrol bîyo, va ke otogarê bajar û qezayan de 5 hezar 650 cayê karî de kontrol bîyo, wasiteyê transportê pêroyî de klîma, roniştişê raywanan, peyakerdişê teberê dingî, neheqîyê ke vera raywananê bêpereyan benê, şuxulnayîşê koltuxanê astengdaran, taksîmetre de kontrolî bîyê. Ey va ke bajar de 6 hezar 360 cayê karî kontrol bîyê û seba îşxalê ke qadanê şarî de sey peyarayîran de benê muameleyo fermî bîyo. Hemşaredar Hatunî ke va bajar de mudaxeleyê 101 awanîyanê qaçaxan bîyo, va ke %25ê înan rijnîyayê.
Serekîya Daîreya Xizmetanê Ciwan û Sporî
Hemşaredare Bucak ke va Merkezê Etudê Lîse yê Akademîya Sûrî de aşme de 7 hezar 800 wendekaran îstîfade kerdo, va ke 27 perwerdeyê kayê aqil û zeka ke dinya de trend ê, aşme de 900 wendekaran tira îstîfade kerdo, sinifanê Kodkerdişê Robotîkî de 438 wendekaran perwerde girewto, kursanê sporî yê hamnan û zimistanî ra hewte de 4 hezar kes xizmetê perwerdeyî girewto. Hemşaredare Bucak ke va Vazdayîşê Şarî yê Newroze yê 1. ke reya verêne emser organîze bîyo, 1 hezar 500 kesî beşdarê ci bîyê, va ke çarçewaya mucadeleyê feqîrîye de keyeyanê ke ameyeyê înan kêmî yo, tira 1 hezar 500 wendekaran rê çenteyê wendegehî vila bîyo û 2 hezar 656 kaybazanê sporî rê ardimê neqdî ra îstîfade kerdo.
Serekîya Daîreya Çapemenî, Weşan û Têkilîyanê Şarî
Hemşaredar Hatunî ke va seba ke qeraran kuçe de bigîrê û bi şarî pîya çareserî virazê, pêro parkanê bajarî de şarî reyde pîya ameyê têhet, va ke 33 çalakî sey zîyaretê keyeyan yê bêxebere, têhetameyîşê muxtaran, zîyaretê esnafan, zîyaretê taxan û têhetameyîşê çapemenî organîze bîyê, Yewîna Çareserîye 19 hezar 550 waştişî girewtê, 239 hezar 248 waştiş, pêşnîyaz û gazinê ke xeta Alo 153î ra ameyê zî nirxnîyayê.
Hemşaredar Hatunî ke va pêro pîya fealîyetê çapemenî bi di ziwanan û di lehçeyanê Kurdkî bîyê û bi xizmetê ziwanê nîşanî fealîyetê têkilîye ewro ra dest pêkerdo û bi ney bîyê hîrê ziwanî, wina qisey kerd: “Platformanê medyaya sosyale de hesabê ma rê serre de 150 mîlyon têkilî ronîyayî. Yewîna çapemenî de xeber, fotograf û vîdyoyî bi kalîteyê ajansêk ameyê kerdene, yew serre de 10 hezar 400 xeberê ma (teber ra mecraya medya sosyale) çapemenîya herême û neteweyî de ca girewtê. 1 hezar 400 xeberê ke sîte ra servîs bîyê, 859 hezar 500 rey wanîyayî û resayê raya pêroyî.”
