Endamê Partîya Çepe ya Fransayî Jean-Christophe Sellin dîyar kerd ke vengdayîşê Abdullah Ocalanî ra pey ganî PKK lîsteya terorî ra bêra vatene û vat: “Ganî Abdullah Ocalan zî hepisxane ra vejîyo û sey Nelson Mandela ganî beşdarê proseso sîyasî bo.”
PKK’yî vengdayîşê Rayberê Şarê Kurdî Abdullah Ocalanî yê 27ê sibate ra pey 1ê adare de adirbest îlan kerd. La rixmê qerarê adirbestî zî hêrişanê dewleta tirke dewam kenê. Vengdayîşê Abdullah Ocalanî ra pey çimê her kesî hukmat û dewlete de yo ke gamanê şênberan bierzê. Partîya Çepe ya Fransayî ra Jean-Christophe Sellin derheqê babete de ajansê ANF’yî rê qisey kerd.
‘Ganî PKK lîsteya terorî ra bêra vetene’
Sellin îfade kerd ke vengdayîşê Abdullah Ocalanî ra pey ganî dewleta tirke game bierza, hêzê mîyanneteweyî zî krîmînalîzekerdişê PKK’yî ra fek veradê û PKK’yî lîsteya rêxistinanê terorî ra vejê. Sellin ard vîrî ke DAÎŞ bi saya PKK, YPG û YPJ’yî ame binvistene û wina dewam kerd: “Meseleya ma ya ewilîne PKK’yî lîsteya terorî ra vetiş nîya. Eynê wextî de ganî Abdullah Ocalan zî hepisxane ra vejîyo û sey nimûneyê Nelson Mandela yê 30 serrî ra ver beşdarê prosesî çareserî bo.”
‘Rojhelato Mîyanênî de çar dînamîkê muhîmî est ê’
Dewamê qiseykerdişê xo de Sellin dîyar kerd ke sere de rejîmê Erdoganî dima rejîmê Rojhelato Mîyanên paştîya xo danê dîktatorîye û îfade kerd ke jehrpuç nê rejîman zî demokrasî yo. Sellin dîyar kerd ke Rojhelato Mîyanênî de çar dînamîkê muhîmî est ê û wina dewam kerd: “Ya yewine PKK û Tevgerê Rizgarîya Neteweyî ya Kurde yo ke dormeyê ci de yo. Ya diyîne tecrubeya xoserîya demokratîke ya ke Rojawanî de ya. Nê hêzî rayberîya demkî ya Sûrîyeyî peymanêka xeylê aqilane îmza kerde. Yê hîrêyine alternatîfo demokratîk ê Tirkîya ke dormeyê DEM Partî de yo. Na partî zî nika çarçewaya şorişê şarî de ke mîlyonan merdimî bi baldarî taqîb kenê, eşkena hemkarîya prosesê çareserîya sîyasî bikera. Dînamîko çarin zî hereketê cinî yê ke Îran de yo. Înan zî sloganê ‘Jin, jîyan, azadî’ yê kurdan weçînayo.”
‘Çareserî bi paradîgmaya Ocalanî mumkin a’
Jean-Christopher Sellin çareserî ser o zî nê çîyî vatî: “Nê çar yan zî panc qadî demo ke pîya ameyê erjnayene, reyna heqê tayînkerdişê çarenusê xo tecrubeyê demokratîk, femînîst û ekolojîk û azadîya Ocalan bêra ca, no çî do bêro manayê ‘konfederalîzmo demokratîk’ ke heme problemanê ma çareser bikero.”
