Mergê hunermendo namdar ê kurdî Hêmin Mûkriyanî ser o 39 serrî vîyartê. Hêmin Mûkriyanî şaîro gird yê edebîyatê kurdkî yo ke 18ê Nîsana 1986î de Rojhelatê Kurdistanî de cuya xo vîndî kerda. Mûkriyanî şaîrê şar û welatê xo bî.
Hêmin Mûkriyanî ke nameyê ci yê raşt Muhemed Emîn Şeyhulîslamî Mûkrî yo, wisara serra 1921î de dewa Laçînî ya qezaya Mukriyan a şaristanê Mehabadî de maya xo ra beno. Keyeyê ey herême de namdar o. Domanîya xo de dapîra xo ya bi nameyê Murwete ra; estanek, efsane û şîîrê şaîranê namdaran ê herême goştarîtê. Dima pîyê ey seba wendişî ey erşawito şaristanê Mehabadî.
17 serrîya xo de keyeyê xo ra dûrî keweno û dima reyna agêreno şaristano ke tede ameyo dinya. Bi roj erdî ser o xebityeno û şan de zî keye de wendişê xo domneno. Bi nê hewayî dejê dewij, citkar û kedkdaran xorîn hîs keno. Şaîr, nuştox û açarnayox Hêmin Mukriyanî serrê ke welat û keyeyê xo ra dûr kewto, eserê edebî yê zaf zengînî nuştê. Nînan ra tayî wina yê: Tarîk û Run (1976), Naley Cudayî (1979), Paşerok (1983), Tuhfey Muzeferiye (Oskarman-werger), Kurdîyekan Efsaneyî, Li ser Çepkêk Gul û Çepkêk Nêrgiz, Şazade û Geda.
Romanê Qelaya Dimdimî (Ereb Şemo)û Hewarî Xalî ser o vateyê xo yê verên est o û tarîx, ziwan û kulturê kurdkî de bi seyan xitabet, û şîroveyê ci est ê.
18ê nîsana 1986î de 65 serrîya xo de Urmîyê de şono heqîya xo. Cuya ey çend zehmet ba zî, hende zî bi rûmet bîye.
Hêmin Mûkriyanî şîîra xo de nê waştişî keno:
“Eke ez bimira gorê mi ser o şîn megîrê, bi şayî û govende dorûverê gorê mi de bigêrî û mizgînîya azadîya Kurdistanî mi ra vajî.”
Tayê eserê ey:
1.Dîwana Hêmin
2.Paşerok (Şîir Û Pexşan)
3.Tuhfeyi Muzefferîye (Folklorî Kurdî Ke Karî Oskarmane Hêmin Werîgêrrawete Ser Zimanî Kurdî).
Şazade Û Geda
Kelha Dimdim
Hewarî Xallî
Çepkê Gull, Çepkê Nêrgiz
Efsane Kurdiyekan (Karî Qenat Kordo ye û Hêmin Wergerandiye Farsî)
Nalleyî Cudayî, Şîir 1979
Paşerukî Mamosta Hêmin
Tarîk û Rûn (Şê’r Û Pexşan) 1974
Bargeyî Yaran
