HDK, DEM Partî û DBP’yî ra heyetêk şaristanê Hewlêr yê Başûrê Kurdîstanî de bi munasebetê “Vengdayîşê Aştî û Komelo Demokratîk” yê Rayberê Şarê Kurdî Abdullah Ocalanî dest bi pêvînayîşan kerd.
Buroyê Çapemenî yê DEM Partî derheqê heyeto ke şîyo Başûrê Kurdîstanî û pêvînayîşan keno, eşkerayîyêka nuştekî pare kerde. Eşkerayî de wina ame vatene: “Heyeto ke Hemverfeka HDK’yî Meral Daniş Beştaş, Endamê ma yê Desteya Rayberîya Merkezî Serhat Eren, Hemverfekê Komîsyonê Dîplomasîyî yê DBP’yî Murat Sarisaç, Parlamentera ma Salîha Aydenîz, Hemverfekê ma yê Meclîsê Ciwanan Rêzan Kaganarslan û Temsîlkarê ma yê Hewlêrî Murat Şenî ra yeno pê, Hewlêrî de pêvînayîşan keno.”
Ame dîyarkerdene ke derheqê “Vengdayîşê Aştî û Komelo Demokratîk” yê Rayberê Şarê Kurdî Abdullah Ocalanî do Hewlêr de bi partîyanê sîyasî, kes û rêxistinanê girseyî yê demokratîkan reyde pêvînayîşan bikerê.
Heyetêk eyn hewa ney ra ver Silêmanîye de pêvînayîşê winasînî kerdbî û derheqê prosesî de parekerdişî kerdbî.
