Dayîkanê Licêyîjan derheqê prosesê ke bi vengdayîşê “Aştî û Komelo Demokratîk” yê Rayberê Şarê Kurdî Abdullah Ocalanî dest pêkerd de qisey kerd û vat ke ne tîya de û ne zî Rojava de rewşe nêbedilîyaya. Ganî dewlete gaman bierza û şarê kurdî nêxapêna.
Vengdayîşo tarixî “Aştî û Komelo Demokratîk” yê Rayberê Şarê Kurdî Abdullah Ocalanî ke 27 sibate de ame parekerdene, heme dinya de gulbang da. Xeylê sazî, rêxistin û partîyan paştî daye nê prosesî. Vengdayîşî ser o nêzdîyê di aşmî vîyarte la dewlete hema zî tu gamêka şênbere nêeşte. Derheqê na babete de dayîkanê Licêyîjan ajansê ma rê qisey kerd.
‘Ne tîya de ne zî Rojava de rewşe nêbedilîyaya’
Dayîka Refîqa ke lajê aye peyê berî de yo dîyar kerd ke ne tîya de ne zî Rojava de rewşe nêbedilîyaya, teyareyê înan hema zî wirzenê û wina dewam kerd: “Yew çîyêk eşt orte û ma zî keyfweş bîye la halê hazir kes çîyêk nêkeno. Ma zaf keyfweş bîyê. Çimkî ma her hetî ra dej kaş kerdo ma wazenê no surec hol şêro. Hepsîyî ma est ê. Lajê mi bi xo ha hepsî de, di hebî qijê ey est ê. Ha Hepisxaneyê Tekîrdagî de. Embazê ey pêro sey ey ê. Serok zî bi çend serrî yo peyê berî de yo. Şîyê ey het ameyê ma vat qey çîyêko hol virazîyo la ma hema zî çîyêko net nêzanê. Ma vajê kesê ke mecbûr mendê şîyê Ewropa, cezaya înan est a ma wazenê ê zî bêrê. İnşela çîyêk virazîyo. Eke virazîyo ma keyfweş benê. Hepsîyê ma peyê beran ra veradîyê, êyê ke ha teberî de herkes bêro keyeyanê xo, mîyanê qijanê xo, keye û kulfetê xo. Vanê ma çîyêk kenê la hema ne tîya de ne zî Rojava de çîyêk nêbedilîyayo. Hema zî teyareyê înan şonê. Nê semedî ra ma hema bawer nêkenê ke senî beno. Înşela hol bibo.”
‘Wa pêro bibê yew’
Dayîka Yildiz bale ant babeta aştî ser o û vat ke ê zaf keyfweş bîyê ke prosesêko winasîn dest pêkerd. Dayîka Yildiz îfade kerd ke ê paweyê xebera aştî yê û wina vat: “Vanê ma şonê Apoyî vînenê yenê. Çimê ma zî ha televîzyonî de, ma vanê înşela yew xeberêka hole bêra. Ma vanê înşela barişêko xeyrîn bêro, ma o qeyde yew zerrî danê xo, ma yew keyf danê xo. Ma paweyê xebêra aştî yê, xebêrêka xeyrin ê. Ma vanê wa dewlete yew çî bikera la seke çîyêk nêkena. O semedî ra zaf yew bawerîya ma ci rê çin a. Dewlete eyn qeyde dewam kena. Ma nêzanê a se kena. Se kena zî nimite kena. Ma vanê wa Apo veradîyo. Ma vanê dewlete pêro yew dewlete ba. Wa nêvajî na dewlete yê kurdan a, na dewlete ya tirkan a. Wa çîyêko winasîn çin bo. Wa pêro bibê yew, bibê wa û bira.”
‘Ma barişê înan ra çîyêk fehm nêkerd’
Dayîka Lutfîye qiseykerdişê xo de bale ant têkoşînê şarê kurdî ser o û dîyar kerd ke ganî dewlete game bierza û waştişanê înan bîyara ca. Dayîk Lutfîye xo wina kerd: “Yanî no însan hende mucadele dayo, hende însan şîyo binê erd. Ê vanê şehîdê ma est ê, ê ma zî zaf ê. Hema vanê wa sîlahanê xo ronê û temam ma bariş kenê. Gelo no barişo senîn o? No bariş nîyo. Ya pê ma xapênanê yan zî ma nêzanê se kenî. Çîyêko ecêb o, ma hema fikirîyenê. Yanî nê wina vanê la ma hema înan ra yew game nêdîya. Gamêk nêrzenê. Gerek sozanê xo bîyarê ca. Eke soze nêdî bariş senî beno? Hayir, bariş nêbeno! No şar semedê çi şîyo koyan? Çi wazenê? Gerek goreyê vatişanê înan bêrê rayîrê ser. Genel ef gerek vejîyo, ê ke peyê beran de yê vejîyê. Ma çîyêk fehm nêkerd barişê înan ra. Ma barişî rê keyfweş bîyê la gelo sey mektube şonê nêşonê. Tena Serokî veradê nêbeno. Serokî veradanê vanê ma hepsê keyeyî danê ci wa bêro şêro zere. Û wa gerîlayî sîlahanê xo ronê, teslîm bibê. O qeyde nêbeno. Ganî yew yasa vejê, çi sozê dayê nê însanan ganî heqê înan bidê. Gerek genel efû vejê, wina rehet o. Ê seba çi şer kenê, ê zî zanê heme dinya zî zana. Eke ê çîyêk nêkerê wa kurdî pêro wirzê pay. Wa kurdan nêxapênê. Kamca de kurdî est ê wa wirzê pay, na çi xap a ma xapênenê.”
