Prof. Dr. Îzzettîn Onderî îfade kerd ke semedê serkewtişê prosesî gerek tay şertî bêrê caardene û vat, “Bi sîstemê netewe-dewlete dostîya mabênê şaran qedîyaye.”
Prof. Dr. Îzzettîn Onder ke pisporanê îktîsatê marksîstî ra yew o, derheqê prosesê neweyî de ajansê ANF’yî rê erjnayîşî kerdî.
Îzzettîn Onderî nê vatî: “Na mesela bi serran o yena îxmalkerdene û redkerdene. Bi sîstemê netewe-dewlete dostîya mabênê şaran helîyaye. Wird hetan zî dejê giranî antî û na mesele heta rojanê ma ameye. Ez teqdîr kena ke na mesele semedê çareserkerdişî ameye destgirewtene. Gerek wird hetî zî gamê ke hewce kenê bierzê ke destkewteyê muhîmî bêrê destfînayene. Semedê serkewtişê prosesî gerek tay şertî bêrê caardene.
Xeylê reyî çareserkerdişê na mesele ameye ceribnayene la peynîya ci nêameye. Na reye seba ke netîceyo mende bêro girewtene gerek şertê ci bêrê caardene. Seba ke no proses ser bikewo gerek wird hetî yewbînan nêxapênê û binê tesîr û zextê emperyalîstan de memanê. Ma hêvî kenê ke na rey şertê yew ca de ciwîyayîşî bêrê caardene. Bi kilmkî çareserîya na mesele ya ke bîye sebebê dejanê giranan, pabesteyê nîyet û cehdkerdişanê samîmîyan ê wird hetan o.”
