Îdareyê Hepisxanaeyê Tîpê F’yî yê Bolu girewte Îhsan Balkaşî ra semedê mektubê kurdkî yo ke nuşto pereyê açarnayîşî waşt.
Îdareyê Hepisxaneyê Tîpê F’yî yê Bolu ke tim bi binpaykerdişê heqanê girewteyan rojeve de yo, heqê dayîş û girewtişê xeberan ê girewte Îhsan Balkaşî bi hewayêko keyfî asteng keno.
Mektubê Balakî yê ke bi ziwanê xo yê dayîke kurdkî nuşto, hetê îdareyî hepisxaneyî ra bi îdîaya ke nêyeno famkerdene, nêameyî erşawitene. Reyna îdareyî semedê mektuban pereyê açarnayîşî waşt.
Avûkatanê OHD’yî ra Bêrîvan Barîna ke Îhsan Balkaşî reye pêvînayîş kerd, na rewşe sey binpaykerdişê heqanê dayîş û girewtişê xeberan hesibna û bale ante ser o ke na rewşe açarîyaya mekanîzmaya sansurî.
Bêrîvan Barîn nê kerdişî sey binpaykerdişê heqan pênase kerd û wina vat: “Na rewşe heqê girewteyanê kurdan dayîş-girewtişê xeberan fîîlen keno bêîmkan.Girewteyê ke rewşa înan a ekonomîkî xirab a heqê înan ê dayîş û girewtişê xeberan bi temamî destê înan ra yeno girewtene. Dewlete selahîyetê xo yê kontrolkerdişê dayîş û girewtişê xeberan açarnayo mekanîzmaya sansurî. Girewteyê ke destur nêdîyeno bi ziwanê xo yê dayîke binusê, hetê nasname ra raştê muameleyê xirabî yenê. Tena heqê dayîş û girewtişê xeberan nê gerek rûmetê merdimîye zî bêro pawitene.”
Bêrîvan Barîn wina dewam kerd: “Heqê dayîş û girewtişê xeberan heqo bingeyîn o. Îdareyê hepisxaneyî bi waştişê pereyê açarnayîşî yê semedê fax û metubanê kurdkî, heqê cuya taybete û mîyankerdişê dayîş û girewtişê xeberan o ke bi madeyê 20. yê Qanûnê Bingeyî gêrîyayo binê temînatî, binpay keno.”
Balkaşo ke metubê ci nêameyî şawitene derheqê binpaykerdişê heqan de Dadgerîya Înfazî ya 2. ya Bolu rê îtîraz kerd la îtîrazê ci hetê Mehkemeya Cezaya Girane ya 1. ya Bolu ra ameyî redkerdene. Badê nê qerarî avûkatan muracatê Mehkemeya Qanûnê Bingeyî kerd.
