Romanê nuştox Şerîf Yilmaz ê bi nameyê ‘Lawikê Gundî’ bi îdiaya “weşanî hetkarî dano rêxistinî” ameybî komkerdiş. Pawitoxê Yilmazî verba qerarê komkerdiş û qedexekerdişî de îtîraz kerd.
Nuştox Şerîf Yilmaz (62) Semsûr de cuyeno û 28ê Teşrîna 2024î de bi îdiaya “endamîya rêxistinî” keyeyê xo de ame destbendkerdiş. Yilmaz, sereştişê keyeyî de ame binçimkerdiş û romanê ci yê bi nameyê “Lawikê Gundî” ke heskerdişê mîyanê Xemgîn û Gulbîne de vano, ame destronayîş.
Kitabê behsê xebere de 15ê Gulana 2022î de hetê Weşanxaneyê Ronyayî ra ame çapkerdiş û seba qerarê komkerdiş û qedexekerdişî. Serdozgerîya Komara ya Semsûrî serpiroyî ame kerdiş. Mahkemeya Cezayanê Sulhî yê Nobedar ê Semsûrî, 28ê Kanûne de serpiroyê serdozgerî yê bi îdiaya “weşanî hetkarî dano rêxistinî” qebul kerd û seba kitabê qerarê komkerdişî û qedexeyî da. Nêzdîyê 4 aşman ra dima yanî 18ê Nîsana 2025î de qerar Yilmaz rê ame teblîxkerdiş.
Dima teblîxkerdişê qerarî, avûkatê Yilmazî verba qerarî de îtîraz kerd. Waştişname de ame vatiş ke dadgerî rojêk dima waştişê dozgerî qerarê xo dayo û qerar verê açarnayîşê kitabî yê kurdkî hetê kesanê pisporî ra bêro kerdiş. Serpiroyî de ame destnîşankerdiş ke kitab seba ke bi kurdkî yo, no ser ameyo qedexekerdiş. Waştişnameyê îtîrazî de ame waştiş ke qerarê qedexekerdişî bero betalkerdiş.
