Rayberîya Xosere seba Sirri Sureyya Onderî mesajê serweşîye erşawit û vat: “Bi dejêko pîl ma agahîya mergê ey eşnawit. Ma vengêko azad û mezgêko roşn vîndî kerd la mîrasê ey o têkoşînî do vîrê heme şaran de bo.”
Rayberîya Xosere ya Demokratîke ya Herêma Vakur û Rojhelatê Sûrîyeyî seba Sirri Sureyya Onderî mesajê serweşîye erşawit.
Mesajê Rayberîya Xosere de nê çîyî ameyê vatene: “Bi dejêko pîl ma agahîya mergê parlamenter, nuştox û têkoşerê sîyasî Sirri Sureyya Onderî girewte. O kesayetêko muhîm yê têkoşînê sîyasî bi û endamê Heyetê Îmraliyî bi. Rolê ey hewldayîşanê aştî û dîyalogo demokratîkî de Tirkîya û herême de bierj û muhîm bi.
O vengêko bicesaret bi ke waştişanê şarê herême yê seba azadî û edaletî ardêne ziwan. Sîyasetmedar û zanyarêko sozdar bi ke çareserîya aştîyane û demokratîke ya meseleyê kurdî ra bawer bi û bicesaret heqanê şaranê bindestan ser o vindertêne û vera polîtîkayanê zilm û îqtîdarî serewedaritêne.
Ma sey Rayberîya Xosere ya Demokratîke ya Herêma Vakur û Rojhelatê Sûrîyeyî şarê xo rê, şarê Tirkîya rê, rayembaz û keyeyê ey o birûmet rê serweşî wazenê. Bêguman do têkoşînê Onderî seba awankerdişê sîstemêko demokratîkke heq û azadîya heme kesan bêyî peygoşkerdişî, teqez biko û sey îlham bimano.
Mergê ey reyde ma vengêko azad û mezgêko roşn vîndî kerd la mîrasê ey o têkoşînî do vîrê heme şaran de biciwîyo ke seba înan têkoşîn dayo.”
