Xebera mergê parlamenterê DEM Partî Sirri Sureyya Onderî ra pey xeylê kes, partî û temsîlkaran seba serweşîye mesajî erşawitî û dejê xo îfade kerd.
Sirri Sureyya Onder ke Stenbol de nêweşxaneyê Florence Nightingale de 18 rojî yo ameyêne tedawîkerdene, dima ke tedawîya ey êdî cewab nêda, 3ê gulana 2024î de saete 16:00î de şi heqîya xo.
Kes, partî û temsîlaran ke xebera mergê ey girewte, bi erşawitişê mesajan keye, dost û embazanê ey rê serweşîye waşte û dejê xo îfade kerd. Rayberîya Xosere ya Demokratîke Vakur û Rojhelatê Sûrîye, Serekê YNK’yî yê Pêroyî Bafil Talebanî, Serekê Partîya Demokrat a Kurdîstanî (PDK) Mesûd Barzanî, Cagirê Serekwezîrê Herêma Kurdîstanî Qubad Talebanî, Serekwezîrê Herêma Kurdîstanê Mesrûr Barzanî derheqê mergê Sirri Sureyya Onderî de mesajê serweşîye erşawitî û înan vat ke şarê kurdî dostêko rasteqîn û rayembazêko sozdar vîndî kerdo. Mesajê nê kesan wina yê:
Mesajê Rayberîya Xosere ya Demokratîke ya Herêma Vakur û Rojhelatê Sûrîyeyî seba Sirri Sureyya Onderî wina yo:
Mesajê Rayberîya Xosere de nê çîyî ameyê vatene: “Bi dejêko pîl ma agahîya mergê parlamenter, nuştox û têkoşerê sîyasî Sirri Sureyya Onderî girewte. O kesayetêko muhîm yê têkoşînê sîyasî bi û endamê Heyetê Îmraliyî bi. Rolê ey hewldayîşanê aştî û dîyalogo demokratîkî de Tirkîya û herême de bierj û muhîm bi.
O vengêko bicesaret bi ke waştişanê şarê herême yê seba azadî û edaletî ardêne ziwan. Sîyasetmedar û zanyarêko sozdar bi ke çareserîya aştîyane û demokratîke ya meseleyê kurdî ra bawer bi û bicesaret heqanê şaranê bindestan ser o vindertêne û vera polîtîkayanê zilm û îqtîdarî serewedaritêne.
Ma sey Rayberîya Xosere ya Demokratîke ya Herêma Vakur û Rojhelatê Sûrîyeyî şarê xo rê, şarê Tirkîya rê, rayembaz û keyeyê ey o birûmet rê serweşî wazenê. Bêguman do têkoşînê Onderî seba awankerdişê sîstemêko demokratîkke heq û azadîya heme kesan bêyî peygoşkerdişî, teqez biko û sey îlham bimano.
Mergê ey reyde ma vengêko azad û mezgêko roşn vîndî kerd la mîrasê ey o têkoşînî do vîrê heme şaran de biciwîyo ke seba înan têkoşîn dayo.”
Serekê YNK’yî yê Pêroyî Bafil Talebanî:
“Mi bi qesawetêko gird xebera mergê endamê Heyetê Îmraliyî Rêzdar Sirri Sureyya Onderî girewte. Seba na xemgînîya xorîne ez wazena ke keyeyê ey o erjaye rê serweşî û sebir wazena. Reyna bi taybetî ez DEM Partî û pêroyê kesê ke bawerîya înan bi rayîrê aştî û dîyalogî çareserîya meseleyê kurdî rê est a, înan rê serweşîye wazena.
Sirrî Sureyya Onder embazêko naskerd bî ke seba şarê kurdî sozdar bî. Helwêstê ey o bi qerar pawitişê heqanê meşrû yê şarê kurdî de demanê cîya-cîyayan de bala şarî ante xo ser o; Ey hewl da ke Vakurê Kurdîstan û Tirkîya de prosesêkê aştî awan bikero û mesele bi rayîrê dîyalogî çareser bikero. Mergê ey vîndîkerdişêko pîl o. Şarê kurdî dostêk û embazêko sozdar û fedakar vîndî kerd.
Ez Homayo pîlî ra hêvî kena ke rehma xo Rêzdar Sirrî Sureyya Onderî ser o bivarno. Ez keye û heskerdoxanê ey rê serweşî û sebir wazena.”
Mesajê Serekê Partîya Demokrat a Kurdistanî (PDK) Mesûd Barzanî wina yo:
“Bi nameyê Homayê Pîl û Birehm. Ma bi xemgînîyêka pîle xebera mergê kesayeto namdar, sîyasetmedar û Cagirê Serekê Parlementoyî Sirri Sureyya Onderî eşnawite. Endamê Heyeta Îmralîyî Sirrî Sureyya Ondero rehmetî, beşêko pîl cuya xo ra seba hewldayîşanê sîyasî û aştî cîyakerdbî û hewldayîşê ey ê seba çareserîyêka aştîyane Tirkîya de layiqê rêz û hurmetêko pîl ê. Ez keye, merdim, embaz, rayembaz, rayber û endamanê DEM Partî û heskerdoxanê Sirrî Sureyya Ondero rehmetî rê serweşî wazena û dejê înan pare kena. Ez Homayê pîlî ra rîca kena ke cenetêko hîra bido canê ey û her hetî ra aramî û serfirazîye bido ey. Înna Lîle ve Înna Îleyhî Racîun (Ma aîdê Homa yî û ma do agêrê ey het).”
Mesajê Cagirê Serekwezîrê Herêma Kurdîstanî Qubad Talebanî û Serekwezîrê Herêma Kurdîstanî Mesrûr Barzanî wina yê:
Mesajê xo de Mesrûr Barzanî îfade kerd ke Sirri Sureyya Onder dostêko kehen yê şarê kurdî yo û dîyar kerd ke o prosesê aştî yê Tirkîya de wayîrê nasnameyêko muhîm yê têkoşer o. Mesrûr Barzanî mesajê xo de îşaret kerd ke Onderî xurtkerdişê hîsê birayî û yewbîyayîşê mabênê şarê kurd û tirk de rolêko aktîf û pêşeng kay kerdo.
Mesrûr Barzanî mesajê xo de wina vaT: “Ez keye û merdimanê sîyasetmedarê namdarî yê DEM Partî û Serekwekîlê Parlementoyê Tirkîyeyî Sirri Sureyya Onderî rê serweşîye wazena. Homay rehma xo ey rê bivarno û cayê ey cenet bo. Seba pêroyê hetan ez sebir û aştî wazena.”
‘Wayîrê rolêko pêşeng bi’
Cagirê Serekwezîrê Herêma Kurdîstanî Qubad Talebanî seba Sirri Sureyya Onderî bi mesajêk serweşî waşt. Qubad Talebanî mesajê xo de îfade kerd ke Onder dostêko kehen yê şarê kurd bîyo û dîyar kerd ke ey prosesê aştî yo Tirkîya de têkoşînêko muhîm dayo.
Qubad Talebanî dîyar kerd ke Sirr Sureyya Onderî xurtkerdişê birayî û yewbîyayîşî mabênê şarê kurd û tirk de rolêko aktîf û pêşeng kay kerdo û helwêstê ey o aştîwaz û demokratîk bi rêzdarî ard vîrê xo.
Qubad Talebanî mesajê xo de reyna va ke mergê Onderî tena keye û heskerdoxanê ey rê nê, pêroyê şarê herême rê zî vîndkerdişêko pîl o. Talebanî keye û heskerdoxanê Onderî rê serweşî waşte.
Sirrî Sureyya Onder badê merasîmo ke do 4ê gulane roja yewşeme Stenbol de bêro organîzekerdiş, do Goristanê Zincirlikuyu de bêro definkerdiş.
