Şaredarîya Amedî ya Şaristanê Girdî û Kolektîfê Vîrê Amedî, seba programê Projeya Raywanîya Vîrê Komelkî û Mekankî ya Sûrî aktîvîteyêk organîze kerd.
Serekîya Daîreya Karanê Kultur û Sosyalan, Kolektîfê Vîrê Amedî reyde pîya çarçewa Projeya Raywanîya Vîrê Komelkî û Mekankî ya Sûrî de yew aktîvîte organîze kerd. Aktîvîte ke Muzeya Bajarî ya Koşkê Cemîlpaşayî de ame organîzekerdiş, ciwanê ke 18-35 serrî beşdar bîyî.
Ganî vîr bêro ganîkerdiş
Mîyanê proje de ke gedeyî zî do prosesanê peyênan de îlawe bibê, hedef o yo ke vîrê mîrasê tarîxî û kulturî yê bajarî reyna bêro ganîkerdiş.
Proje reyde erjê kulturî ke reyayê bajarî virazenê, nêzdî ra bêrê şinasnayîş û seba ke vernîya xerîbbîyayîşê erjanê kulturî bigîro, ameye amanckerdene.
Do bikewê raywanîya vîrî
Proje reyde ciwanî û gedeyî ke teorîk û pratîk tecrûbeyanê xo temam kenê, do Sûr de 20 cayê vîrî ke do bêrê dîyarkerdene, dekewê mîyanê raywanîya vîrê estbîyayîşê komelkî, mekankî, tarîxî û kulturî bê. Kesê ke xebatanê xo temam kenê, do nê programî ra mezûn bibê.
‘Ke ziwan yeno xovîrakerdene, vîrê tarîxî zî kêmî beno û vindî beno’
Zeynep Yaş ke Sereka Daîreya Karanê Kultur û Sosyalan a, beşdarê aktîvîte bîye û dîyar kerd ke dîyayîşê ciwanan ê aktîvîteyanê nê tewiran de hêvî dano aye û keyfweş keno. Yaş wina qisey kerd: “Ez bi raştî sereberz bîya. Ewro zî ciwanî bajar de wayîrîye kenê tarîx û vîrê xo rê. Seba vîrêko hîna rindek xebitîyenê, ez tewr zîyade seba ney keyfeş bîya.”
Dima ke Yaş bi kurdkî qiseykerdişê xo dewam kerd û va: “Seke tarîxê ma ehemîyet dano, ganî ma nê tarîx û ziwanê xo yê dayîke zî bizanê û bişinasê. Çunke vîrê tewr gird ê cuye ziwan o. Ke ziwan yeno xovîrakerdene, vîrê tarîxî zî kêmî beno û vindî beno.”
