Roniştişanê UPR’yî yê ÎHK’yî yê Neteweyanê Yewbîyayeyan (NY) de rewşa heqanê merdiman a Tirkîya ameye nîqaşkerdene. Qiseykerdişan de ame parekerdene ke Tirkîya heqanê merdiman de apey şîya.
Koma Xebate ya Erjnayîşê Perîyodîkî ya Globale (UPR) ya Konseyê Heqanê Merdiman (ÎHK) ê Neteweyanê Yewbîyayeyan (NY) rewşa heqanê merdiman a Tirkîya erjnaye. Temsîlkarê 193 welatan tewrê roniştişan bîyî.
Temsîlkaran dîyar kerd ke Tirkîya warê heqanê merdiman de apey şîya. Temsîlkaran waşt ke wa Tirkîya qanûnan goreyê krîteranê mîyanneteweyîyan sereraşt bikerê.
Hetkarê Wezîrê Karanê Teberî yê Tirkîya û Serekê YE Balyoz Mehmet Kemal Bozayî îdîa kerd ke înan xeylê waran de reformê cidîyî kerdê.
Raporo ke pisporanê Konseyê Heqanê Merdiman amade kerdo tede derheqê binpaykerdişê heqan de daneyê hîrayî ameyî parekerdene. Rapor de ame îfadekerdene ke Tirkîya de mehkemeyî azad nîyê, azadîya fikiran çin a, tecrîdê vera Rayberê Şarê Kurdî Abdullah Ocalanî nêyeno qebulkerdene, cinîyî hetê ewleyî ra binê tehdîtan de yê ûsn.
Raporê UPR’yî yê ÎHK’yî rojanê verê ma de do bêro weşanayene.
