Birayê Alî Haydar Kaytanî, Hayatî Kaytanî seba wefatê her di şehîdanê PKK’yî mesajêk erşawit. Hayatî Kaytanî mesajê xo de wina vat: “Ez gedeyîya xo ra heme embazanê awankerdoxan sey ilahê zerrîya xo erjnena.”
Partîya Karkeranê Kurdîstanî (PKK) vizêr encamê kongreya xo ya 12. eşkera kerdbi û dîyar kerdbi ke xo fesih kerdo. Reyna kongre de şehadetê awankerdox û pêşengehanê PKK’yî Alî Haydar Kaytan û Riza Altunî zî amebi dîyarkerdene. Kongre dîyarîya înan ameye kerdene. Eşkerakerdişê şehadetê Alî Haydar Kaytan û Riza Altunî ra pey xeylê şaristananê vakurê Kurdîstan û Tirkîya de rojanê dîyarkerdeyan de do tezîye bêra ronayene. Birayê Alî Haydar Kaytanî, Hayatî Kaytanî zindanî ra seba her di şehîdanê PKK’yî mesajêk erşawit.
Mesajê Hayatî Kaytanî wina yo:
‘Înan dinyaya xo bedilnaye, nêmerdî’
“Ez gedeyîya xo ra heme embazanê awankerdoxan sey ilahê zerrîya xo erjnena. Mi heta nika hewl da ke vîrameyîşanê nê îlahan rê girêdaye bimana, înan rê biba rayîr û biba embazê înan. Ez zana ke no zehmet o la çend zehmet beno wa bibo hemverê sadakatê nê embazan seba ke ez vîrameyîşanê înan rê biba cewab, ez nika hîna baş zana ke senî biciwîya. Xora tradîsyono ke mergî ra bawer nêkenê, ey ra yenê. Kulturê Elewî de Kirmanckî de bedilnayîşê dinya ra yeno behskerdene. Seba mi zî înan dinya bedilnaya, la ma reyde yê. Rayîro ke ma şonê, herikîyayîşê cuye de, her roja ke akewena, estareyanê tewr beriqîyayeyan de do her tim ma reyde bibê. Her şehadetî de, estarebîyayîşî de besto bîyolojîk seba ma zaf muhîm nîyo. Mi ke gedeyîya xo newe qedênayêne, tewr pîlê ma Heval Fuatî dest bi raywanîya xo ya gêrayîşî kerdbi. Beno ke ma pîya zaf nêciwîyayî la ez têkoşînî gedeyîya xo ra înan reyde ciwîyaya. Ez do heta peynî zî înan reyde biciwîya.
‘Mamosteyê min o cuye yo tewr pîl bi’
Ez hevalê Fuatî ra zafêr hevalê Riza reyde ciwîyaya, ma pîya têkoşîn da. Mamosteyê min o cuye yo tewr pîl bi. Mi cuya xo ya 22 serrî ya zindanî de tim ê ardê xo vîrî, mi hewl da layiqê înan biba. Û no proses dewam keno. Ma nika kewenê rayîrêko newe. Ez zana ke no rayîr do ma hetê gerdûnî de xurt bikero û hereketê Apoyî rolêko winasîn bigîro xo ser o ke Şorişê Ekîmî zî derbas bikero. Heme embazî ke zindan de yê ma vanî ke ma do rayîro ke Rayber Apo bido vernîya ma do ey reyde bibê. Ma do sey wendekarê Rayber Apoyî lanetê hemrayîye ya ke qêm nêkena xo ser o ra bierzê, layiqê heme şehîdanê xo bibê û vîrameyîşanê înan biresnê heqîqetî. Sere de sereyê hemrayanê Rayber Apoyî, keyeyanê ma û yê şarê ma weş bo. Ma do heta peynî şima reyde bê. Ma do şima reyde biciwîyê û na raywanîya birumete pîya bi azadîye tacîdar bikerê. Ma eşkenê wina layiqê Şehîd Fuat û Şehîd Riza bibê. Ez heme şarê ma silaynena ke bibê neferêkê na raywanîya pîroze. Ez heme keyeyan rê serweşîye wazena. Wa ruhê înan şad, dewrê înan ebedî bo. Bi heskerdiş û hurmetanê xo.”
Hayatî Kaytan
