Koma Xebatê ya Kurd a Parlamentoya Ewropayê daxuyand ku piştî biryarên dîrokî yên ku ji hêla PKKê ve hatine girtin, divê Tirkiye vê derfetê bikar bîne û weke gava yekem êrîşên xwe yên leşkerî rawestîne, girtiyên siyasî serbest berde û azadiyên bingehîn bên misogerkirin.
Koma Xebatê ya Kurd a Parlamentoya Ewropayê biryara fesihkirina Partiya Karkerên Kurdistanê (PKK) û bidawîanîna têkoşîna çekdarî bi keyfkeşî pêşwazî kir. Komê diyar kir ku ev biryar bidawîbûna serdemekê temsîl dike, lê di heman demê de ji bo aştiyê destpêka têkoşînek nû ya demokratîk nîşan dide. Bang li hikûmeta Tirkiyeyê hat kirin ku vê derfeta dîrokî hem ji bo Kurdan hem jî ji bo Tirkan bikar bîne.
Di daxuyaniya komê de hat destnîşankirin ku divê Tirkiye guhertinên qanûnî û siyasî bike da ku pêvajoya çareseriya aştiyane hêsan bike. Hate diyarkirin ku divê azadiyên bingehîn bên misogerkirin da ku nakokiyên siyasî bi rêbazên demokratîk bên çareserkirin û wekî gava yekem, divê hemû girtiyên siyasî bên berdan û zextên siyasî yên li ser dadweriyê bi dawî bibin.
Di daxuyaniyê de hat gotin ku ev biryar di demeke ku demokrasiya li Tirkiyeyê di bin gefeke cidî de ye hat girtin û pêvajoya aştiyê bi piştgiriya partiyên siyasî yên cûrbecûr hatiye teşwîqkirin. Hate diyarkirin ku divê Meclisa Tirkiyeyê beşdarî pêvajoyê bibe û ev pêvajo bibe bingeha pêvajoya nû, demokratîk û aştiyane. Di daxuyaniyê de hişyarî hat kirin ku divê aştî ji aliyê ti pêkhateyeke siyasî ve neyê desteserkirin û ji bo berjewendiyên siyasî neyê manîpulekirin.
Di daxuyaniyê de hat bibîrxistin ku tevî biryara agirbestê ya PKKê jî artêşa Tirk êrîşên xwe yên li ser baregehan domand û di şert û mercên dijwar de kongreya kritîk a PKKê pêk hat. Di daxuyaniyê de ji Tirkiyeyê hat xwestin ku êrîşan rawestîne û ji bo pêvajoyeke aştiyê mekanîzmayên misogerkirinê û ewlehiyê yên pêwîst ava bike. Her wiha hate gotin ku divê Tirkiyeyê leşkerên xwe ji Herêma Kurdistana Iraqê vekişîne û ji bo xelkê hatine koçberkirin bi ewlehî vegere gundên xwe bibe alîkar.
Li ser rewşa Sûriyeyê jî hat gotin ku Tirkiye bi îdîaya Rêveberiya Xweser a Bakur û Rojhilatê Sûriyeyê girêdayî PKKê ye û vê yekê weke hinceta êrîş û dagirkeriya li dijî herêmê bi kar anî. Hat bibîrxistin ku Rêveberiya Xweser qet gefek rastîn li ser Tirkiyeyê çênekiriye, bi fesihkirina PKKê re ev hincet ji holê hatiye rakirin, divê êrîş bi dawî bibin û hêzên leşkerî yên Tirk ji herêmê vekişin.
Di dawiya daxuyaniyê de ji saziyên Ewropayê hat xwestin ku ji bo ev kêliya dîrokî bibe destêka veguherîna demokratîk a rastîn, bi erka xwe rabe.
