Hemleya ‘Rayber Apoyî rê Azadîye, Meseleya Kurdan rê Çareserîya Sîyasîye’ netîceyê muhîmî bidestvistî. Vervatoxanê hemleyî vat ke ê do xebatanê xo bidomnê û kampanyaya ‘Ez wazena Ocalan reyde pêvînayîş bikera’ bidê destpêkerdene.
Vervatoxanê hemleyî Hatîp Dîcle, Zubeyde Zumrut û Sînan Onalî derheqê babete de ajansê ANF’yî rê qisey kerd.
Sînan Onalî îfade kerd ke seba aştîyêka menda azadîya Rayberê Şarê Kurdî Abdullah Ocalanî zaf muhîm a û vat: “Deklarasyonê PKK’yî ra dima êdî ganî dewlete gamanê sîyasî û huqûqîyan bierza, zemînê muzakerayan awan bikera û reformanê sîyasîyan bikera. Ganî PKK lîsteya terorî ra bêra vetene. Ganî dewletê Ewropa zî tedaya dewleta tirke bikerê ke heqanê kurdan bişinasna û prosesê dîyalogan bîyara ca. Vengdayîşê Rayber Apoyî tarîxî bi û bingeyê demokrasîyî eşt.”
Zubeyde Zumrut dîyar kerd ke Vengdayîşê Rayberê Şarê Kurdî Abdullah Ocalanî bîyo gama hîrêyîne ya Hemleya Azadîye û vat: “Vengdayîşê Rayber Apoyî xerîtaya çareserîya meseleya kurdan eşkera keno. Rayber Apoyî rixmê şertanê Îmraliyî zî seba aştî xîret kerd û game eşte. Nika ganî heqê hêvî seba Rayber Apoyî û tepişteyanê sîyasîyan bêro caardene. Ma na çarçewa de Ewropa de xebatî kerdî û do nê xebatan bidomnê. Ma do kampanyaya ‘Ez wazena Ocalan reyde pêvînayîş bikera’ bidê destpêkerdene. Na kampanya do bingeyê prosesêkê neweyî yê demokratîkî zî awan bikera.”
Hatîp Dîcleyî pare kerd ke ganî dezgehê Ewropa bikerê ke Tirkîya seba caardişê heqê hêvî qanûnan sereraşt bikera û vat: “Sîyasetê Ewropa zaf eleqe mojna vengdayîşê Rayber Apoyî. No zî mojneno ke Ewropa zî pabeyê çareserîya meseleyê kurdan a. Ma kampanyaya mektuban bi sloganî ‘Ez wazena Ocalan reyde pêvînayîş bikera’ danê destpêkerdene. Nika seba aştî komel de îradeyêko pîl virazîyayo. Şert û mercê aştî zî dîyar ê. Ganî cade seba azadîya Ocalanî gamî ke hewce kenê bêrê eştene. Seba destekê prosesê neweyî û seba averberdişê hemle û kampanyayanê xo têkoşînê ma do bidomîyo.”
