Hemserekanê DBP’î, serrgêra Xoverdayîşê Gezîyî ser hesabanê xo yê medyaya sosyalî de, mesajî pare kerdî û kesê ke cuye xo vîndî kerdî zî yad kerdî.
Hemserekanê Partîya Herêmanê Demokratîkan (DBP) Çîgdem Kiliçgun Uçare û Keskîn Bayindir hesabê xo yê medyaya sosyalî de derheqê serrgêra 12. ya xoverdayîşê Gezî ser o mesajî pare kerdî.
‘Rayîrê ma roşin keno’
Çîgdem Kiliçgun Uçar:
“Roşnîya ke mîlyonan xoverdakarî 12 serrî verê cû vera polîtîkaya rantkarî ya îqtîdarî Parka Gezîyî de kerdî, rayîrê ma roşin kerdî; dewam keno. Nê xoverdayîşê bêemsalî ke verba hêrişkarîya hêzê sîyasî her qismê komelî tede bi, hafizaya ma de nîşanê xorînî verada. Kesê ke cayê cuye xo pawitî, tenya park û yew darî ra nîyo, demokrasî, aştî û azadî rê yew mîsalê bêîtaetîya sîvîle ya bi bandor nîşan da. Xoverdayîşê Gezîyî ke sey yew nêrazîbîyayêkê meşrû, demokratîk û heqî verba zîhnîyetê zordar û otorîterî de bî, ma do rolê pêroyî yê embazê ma yê rayîrî Sirri Sureyya Onderî qetî vîr ra nêkerdî. Ma do Xoverdayîşê Gezîyî ke girêdayenê yewsanîye û paştîgîrîye yê mîyane şaran de awan kerd, xo rê yew rayver bigêrî û têkoşînê mil bi milî hîna zêde gird bikerî. Canê ke ma nê xoverdayîşî de vîndî kerdî, ma reyna bi rêz û hurmetî yad kenî.”
Keskin Bayindir:
“Ma Xoverdayîşê Gezîyî yo ke îlhamê demokrasî, aştî û têkoşînê girdî yo, selam kenî û canê ke nê xoverdayîşî de cuye xo vindî kerdî, ma reyna bi hurmetî yad kenî. Bê şik Xoverdayîşê Gezîyî, vera talanê tebîatî û sîstemê zordarîye, îradeyê pêroyî yê milyonan bi ke azadî, edalet û cuye ekolojîke rê vîstî xo ra. No xoverdayîş wijdanê pîlî yê komelî yo, serrgêra xo ser o, ma do îradeyê xo reyna vanî ke şaran û bawerîyan yewbînan rê yewsan, azad û pîya cuye xo ramitene şênî, yew komelê demokratîkî reyna saz bikerî. Bi têkoşînê azadîye yê şarê kurdî û no zemîn ke têkoşînê demokrasî yê şaranê Tirkîya yew cayo, ma rê nîşan dano ke yew ameyoxê girdî mumkîn o. Açaryayîşê demokratîkî yê ke rêça nê ameyoxî akeno, tenya bi yew pêameyîşê komelkî yo ke beşdarîya yewsane ya şaran, zêdeyî û demokrasî esas a, mumkîn o.”
