Merkezê Cigêrayîşanê Qade yê Sosyo Polîtîk mabênê 18 û 20ê gulane de 16 şaristananê Vakurê Kurdîstanî de cigêrayîşêk kerd û meylê raya pêroyî ya kurdî ya seba prosesî eşkera kerd.
Anket de ke pêvînayîşo rî bi rî 1.504 kesan reyde ame kerdene, paştîya xurte ya seba Kongreya PKK’yî ya 12. bale ante.
Paştîya xurte seba Kongreya PKK’yî
Se ra 71.5 ê beşdaranê anketî qerarê ‘fesihkerdişî’ yê Kongreya PKK’yî ya 12. pozîtîf pêşwazî kerd.
Mîyanê nê nisbetî de yê ke qerarî ‘xeylê pozîtîf’ vînenê se ra 15.1, yê ke ‘pozîtîf’ vînenê zî se ra 56.4 bi.
Se ra 17.4ê beşdaran dîyar kerd ke ê bêqerar î û tena se ra 6ê beşdaran qerarî negatîf erjna.
Seba persê “Goreyê şima no qerar do aştî bîyaro?” se ra 36.8ê beşdaran vat “Eya”, se ra 27.93ê beşdaran var “Beno”, se ra 22.7ê beşdaran zî vat “Ney.”
Berpirsiyarî ya Meclîs û Îqtîdarî ya
Zafaneyê beşdaranê anketî dîyar kerd ke berpirsîyarîya aştîya menda heme çî ra ver ya Meclîs (se ra 48.4) û partîyanê îqtîdarî AKP û MHP (se ra 39) ya. Yê ke berpirsîyarî daye milanê DEM Partî ser o se ra 6.1, yê ke berpirsîyarî daye komelî ser o zî se ra 2.5 bî.
Se ra 79ê beşdaran dîyar kerd ke ganî mecîs bi rengêko çalak înîsîyatîfê prosesî bigîra. Se ra 8.7ê beşdaran dîyar kerd ke ê bêqerar ê, se ra 6ê beşdaran zî na mesela de cewabê “Ney” da.
Krîzê aborî rêza destpêkî de yo
Beşdaranê anketî rê persê problemo sereke yê Tirkîya ame kerdene. Se ra 68.9ê beşdaran vat krîzê aborî û bêkarî, se ra 16.4î vat problemê kurdî. Nînan ra pey zî behsê problemê perwerde, huqûq, demokrasî û ûsn. kerd.
Waştişê destûrê bingeyîn o newe
Nisbetê merdimanî ke nê bawerî de yî ke seba çareserîyêka menda lazimtî bi destûrê bingeyîn o newe est a, se ra 67.4 bi. Cewabê rewşa prosesî ser o zî wina bîyê:
* Gamê demokratîk û cayê bawerî (%13,6)
* Karê seba aştî (%7,6)
* Beşdarbîyayîşê meclîs û partîyanê sîyasî yê prosesî (%7)
* Bi destûro bingeyîn teqezkerdişê heqanê kurdan (%5,8)
* Veradayîşê girewteyanê sîyasîyan û bedilnayîşê destûrê bingeyinî (%4,5)
Meylê weçinitişê ser o: DEM Partî rayanê xo vêş kena
Beşdaranê anketî ra persê “Eke no yewşeme weçînitiş bibo, şima do raya xo bidê kamcîn partî” ame kerdene. Se ra 44.9ê beşdaran vat DEM Partî, se ra 19.5ê beşdaran var AKP. Bi nê hewayî nisbetê rayanê DEM Partî goreyê weçînitişanê pêroyî yê 2023î bi 3.7 pûanan vêş bîyî, yê AKP’yî zî 5.9 pûanan kêm bîyî.
