Teknîkdîrektorê Amedsporî Servet Çetînî dîyar kerd ke “Ma taximê na herêm ê la ma problemê girewtişê sahayan ancenê. Tayê sahayê antrenmanî ke ma şînê, nêdanê ma.”
Çetînî reyna reaksiyon da ke her maç roja dişeme yeno kaykerdene. Amedsporo ke senî ke waşto nêeşkayo dest bi sezonî bikero, bi ameyîşê teknîkdîrektoro newe Servet Çetînî ver bi başîye şina la problemê saha ke destpêkê serre ra dewam kerdêne, hema zî hema nêameyo safîkerdene.
Çetînî ke çapemenî reyde kombîyayîşêk viraşt, qisey kerd û va “Ma taximê herêm ê û tîya yê, ma sahayn de probleman ancenê. Tayê cayan ke ma şînê ke antrenman bikerê, saha nêdanê ma.”
Teknîkdîrektorê Amed Sportif Faaliyetlerî ke Lîga 1. de kay keno, seba ke hewteyî ser o vinderê îdareyê klubî û çapemenî reyde ame têhet. Kombîyayîşî de ke Tesîsê Sporî yê Şehmus Ozerî yê qezaya Kayapinarî de virazîya, sekreterê pêroyî yê klubî Faruk Korkmaz, mesulê şûbeyê futbolî Nedîm Şîmşek û verfekê çapemenî Bekîr Guneş zî beşdar bîyî.
Çetînî qiseyanê xo de va “Şîyayîşê ma nika zaf weş o. Ma netîce ke girewtê, bî sebeb ke moralo weş û motîvasyon resayo kaykerdoxanê ma. Ma wazenê ke heta verê sezonî tewr zaf puanan arê bidê. La ma zanê ke ma kotî der ê û ma hema cayê rehetîyaan de nîyê. Ma do înşalah nê cayî ra şêrê cayêko rehet.”
